Foto: gov.kz
Rásimge oblys ákimi Ashat Shaharov, QR Prezıdentiniń keńesshisi Málik Otarbaev, Prezıdent Ákimshiliginiń ókilderi, Parlament depýtattary, túrli óńirlerden kelgen delegasııalar, batyrdyń týystary men qala turǵyndary qatysty.
Jıyn Álııanyń jarqyn beınesin bir mınýt únsizdikpen eske alýdan bastaldy. QR Prezıdentiniń keńesshisi Málik Otarbaev Memleket basshysy Qasym-Jomart Toqaevtyń quttyqtaýyn jetkizip, Álııa erligi eldik pen otansúıgishtiktiń máńgilik sımvoly ekenin atap ótti.
«Búgin biz Keńes Odaǵynyń Batyry, qazaq halqynyń dańqty qyzy Álııa Moldaǵulovanyń týǵanyna 100 jyl tolýyn atap ótýdemiz. Onyń erligi men janqııarlyǵy talaı urpaqqa úlgi. Bul ataýly kún - tek Aqtóbe óńiri úshin ǵana emes, tutas elimiz úshin tarıhı mańyzdy kezeń. Qazaqstan Respýblıkasynyń Prezıdenti Qasym-Jomart Toqaevtyń tapsyrmasymen, mereıtoı respýblıkalyq deńgeıdegi ataýly kúnder tizimine engizildi. Bul onyń erliginiń memlekettik mańyzyn kórsetedi.
Álııanyń batyrlyǵy - ótken kúnniń ǵana emes, búgingi urpaqty tárbıeleýdiń aıqyn úlgisi. Búkil el kóleminde, sonyń ishinde Aqtóbe oblysynda, Otan úshin janyn pıda etken erlerdiń esimin ulyqtaýǵa baǵyttalǵan keń aýqymdy sharalar júzege asyrylyp jatyr. Bul tarıhty keıingi býynǵa jetkizý - bizdiń perzenttik paryzymyz. Jastardyń boıynda elge degen maqtanysh pen erlik rýhyn sińirý - búgingi mindetimiz», dedi Málik Otarbaev.
Quttyqtaý sózden soń, monýment-eskertkishke gúl shoqtary qoıyldy. Sondaı-aq, bul sharada «Álııa gúli dostaryn qarsy alady» atty Halyqaralyq balalar men jasóspirimder shyǵarmashylyǵy festıvaline qatysýshylar da boı kórsetti.
Eske salaıyq, 2005 jyly turǵyzylǵan Álııa Moldaǵulova eskertkishiniń bıiktigi 3,8 metr. Qola músinniń avtory, músinshi - Baqytjan Ábishev, al bareleftiń avtory - Esken Serǵabaev.
Alına QAIRATQYZY, EUÝ stýdenti
