– Memleket basshysynyń bastamasymen júzege asyp jatqan «Keleshek mektepteri» jobasynyń negizgi maqsat-mindetteri oryndalyp jatyr ma? Osy arqyly qandaı túıtkildi máseleler sheshimin tabady?
– «Keleshek mektepteri» jobasy – qala men aýyl mektepteri arasyndaǵy alshaqtyqty joıýǵa baǵyttalǵan strategııalyq bastama. Jobanyń maqsaty – elimizdiń barlyq óńirinde kez kelgen balaǵa qoljetimdi jańa formattaǵy bilim uıymdaryn qurý. Joǵary sapaly bilim standarttaryn jappaı engizý arqyly ár balanyń jan-jaqty damýyna jáne óz áleýetin tolyq ashýǵa teń múmkindik jasaý. Ulttyq joba balalardyń turǵylyqty jerine qaramastan, zaman talabyna saı jaǵdaıda sapaly bilim alý múmkindigin qamtamasyz etýge baǵyttalǵan. «Keleshek mektepteriniń» 40%-y aýyldyq eldi mekenderde salynyp jatyr. Osylaısha, 200 myńnan astam aýyl balasyn zaman talabyna saı jaıly bilim berý ortasymen qamtamasyz etý josparlanǵan. «Keleshek mektepteriniń» basty artyqshylyǵy – onda oqýshylarǵa qolaıly, ergonomıkalyq bilim keńistigi jasalǵan. Bul mektepterdiń kólemi tıptik jobalarǵa qaraǵanda 15–20%-ǵa úlken, al tehnıkalyq jaraqtanýy jaǵynan 4 esege artyq. Sondyqtan mekteptegi oryn tapshylyq máselesi birtindep sheshiletin bolady.
– Zamanaýı tehnologııamen jabdyqtaý jáne qaýipsizdik júıesine toqtalyp ótseńiz?
– Mektepterde robottehnıka kabınetteri, STEM-zerthanalar, horeografııa zaldary, kovorkıng aımaqtary, 4 sport zaly bar, zamanaýı pándik kabınetter, alǵashqy áskerı daıyndyq úshin arnaıy ashyq alańdar qarastyrylǵan. Barlyq mektep zamanaýı jıhazdarmen jáne oqý qural-jabdyqtarymen jabdyqtalyp, árbir oqý kabıneti úshin qajetti tehnıkalyq quraldar jıyntyǵy qamtamasyz etilgen. Bunyń barlyǵy ustazdardyń jumysyn jeńildetip, oqýshylardyń bilim sapasyn kóterýge múmkindik beredi. Sondaı-aq ulttyq joba aıasynda salynǵan mektepterde qaýipsizdik júıeleri kúsheıtilgen.
– «Keleshek mektepteriniń» qandaı artyqshylyǵy bar?
– Qarym-qabiletine qaramastan kez kelgen balaǵa jaǵdaı jasalǵan, onyń ishinde erekshe bilim berý qajettilikteri bar jetkinshekter úshin de jeke sanıtarlyq bólmeler, keń kabınetter, jedelsaty, pandýstar, arnaıy belgiler, psıholog, logoped jáne defektolog kabınetteri qarastyrylǵan. Sondaı-aq muǵalimder ınteraktıvti tehnologııalar men pándik zerthanalardy qoldana otyryp, ár oqýshynyń qyzyǵýshylyǵy men qabiletine qaraı tulǵalyq damýyna jol ashady. Bilim barysynda Prezıdent belgilegen «Adal azamat» tujyrymdamasynyń negizinde oqýshylardy ádildikke, eńbekqorlyqqa jáne adamgershilikke baýlıtyn qundylyqtar júıesi qalyptasqan. Mekteptegi bilim úderisi tek oqytý emes, ómirge beıimdeý, jaýapkershilik sezimin oıatý jáne qoǵamdyq sanany damytýǵa baǵyttalǵan. Bul mektepterde balalardyń boıynda ekologııalyq mádenıetti qalyptastyrý, qorshaǵan ortany qorǵaý, resýrstardy únemdi paıdalaný sııaqty jaýapkershilikti seziný daǵdylaryn damytýǵa erekshe mán beriledi. Osy qaǵıdalar Memleket basshysynyń «Taza Qazaqstan» ıdeıasyn balalarǵa mektepten bastap boıyna sińirýdi kózdeıdi.
Jobanyń negizgi basymdyqtarynyń biri – oqýshylarǵa erte jastan kásibı baǵdar berý. Bastaýysh synyptarda túrli mamandyq ıelerimen kezdesýler, arnaıy aptalyqtar uıymdastyrylady. 7-synyptan bastap tereńdetilgen beıindik oqytý, tálimgerlik júıesi jáne jeke bilim kýrstary engiziledi. Bul úderisti tıimdi úılestirý jáne basqarý maqsatynda «Mansap kompasy» atty arnaıy sıfrlyq platforma ázirlenip otyr.
– Joba boıynsha kadr saıasaty qalaı júrgiziledi?
– Jobanyń basty mindetteriniń biri – jańa tehnologııalar men ádisterdi tıimdi qoldana alatyn bilikti muǵalimdermen qamtamasyz etý. «Keleshek mektepterinde» pedagogterdiń kásibı damý úderisi úzdiksiz júrgizilýge tıis. Osy maqsatta muǵalimderge arnalǵan jańa pedagogıkalyq tásilder, zamanaýı ádistemeler men sıfrlyq quraldardy meńgerýge baǵyttalǵan baǵdarlama ázirlendi. Búgingi kúni 3000-nan astam muǵalim biliktilikti arttyrý kýrsynan ótti.
«Keleshek mektepteri» modeli elimizdegi barlyq jalpy bilim beretin mekteptiń damýyna negiz bolmaq. Pysyqtalǵan standarttar, ádistemeler, jáne basqarý sheshimderi búkil respýblıka boıynsha taratylady.
Áńgimelesken –
Aıtolǵan JÚNISHAN,
«Egemen Qazaqstan»
