Forýmnyń maqsaty — batyrlyqtyń, Otanǵa degen súıispenshilik pen patrıotızmniń sımvolyna aınalǵan mergen qyzdyń rýhyna taǵzym etý. Sharaǵa memlekettik jáne qoǵam qaıratkerleri, Qazaqstan Respýblıkasy Parlamentiniń Senaty men Májilisiniń depýtattary, mádenıet jáne ǵylym salasynyń ókilderi, sondaı-aq batyrdyń týystary qatysty.
Qazaqstan Respýblıkasy Prezıdentiniń keńesshisi Málik Otarbaev Memleket basshysy atynan forýmǵa qatysýshylar men aqtóbelikterdi osy mańyzdy tarıhı oqıǵamen quttyqtady.
«Álııa Moldaǵulova – búkil qazaq halqynyń maqtanyshy, qaısar rýh pen janqııarlyqtyń sımvoly. Búgingi forým – tarıhı jadymyzdy saqtaý men jas urpaqty patrıottyq rýhta tárbıeleý jolyndaǵy ortaq jaýapkershiligimizdiń kórinisi. Forýmdy uıymdastyrǵan barsha azamattarǵa, Álııa Moldaǵulovanyń erligin urpaq jadynda máńgi qaldyrýǵa atsalysyp júrgen jandarǵa shynaıy alǵysymdy bildiremin. Sizder jastardy Otanǵa degen súıispenshilikke, ulttyq qundylyqtarǵa adaldyqqa baýlyp kelesizder», – dedi Prezıdent keńesshisi.
Sharaǵa qatysýshylardy Aqtóbe oblysynyń ákimi Ashat Shaharov ta quttyqtap, batyr esimin ulyqtaý baǵytynda óńirde júzege asyp jatqan jumystar týraly aıtyp ótti. Atap aıtqanda, Aqtóbe qalasynda jańa mádenıet ortalyǵy men memorıaldyq mýzeı salynyp jatyr, sondaı-aq Álııa aýylynda ınfraqurylym damyp keledi.
Ashat Shaharov óz sózinde pedagog ári qoǵam qaıratkeri, Álııanyń erligin zertteýge jáne jastarǵa rýhanı-adamgershilik tárbıe berýge ómirin arnaǵan Ǵalymjan Baıderbestiń eńbegin erekshe atap ótti.
Forým barysynda Álııa Moldaǵulovanyń erligine, tarıhı jadyny saqtaý jolyndaǵy zertteýshiler men qoǵam belsendileriniń úlesine, sondaı-aq mýzeılik jáne mádenı jobalardyń patrıottyq tárbıedegi róline arnalǵan mazmundy baıandamalar tyńdaldy. Sóz alǵandar qatarynda – ǵylym ókilderi, mýzeı qyzmetkerleri, batyrdyń týystary men arnaıy shaqyrylǵan qonaqtar boldy.
Iаroslavl oblysyndaǵy «Vıatıch» patrıottyq ortalyǵynyń jetekshisi Lıýbov Abramova Vıatskoe aýylynda batyr qyzdyń rýhyna degen qurmet erekshe ekenin aıtyp ótti. 1942 jyly Álııa Moldaǵulova Lenıngrad qorshaýynan evakýasııalanǵan balalarmen birge Vıatskoe aýylyna jetkizilgen edi.
«Biz Iаroslavl oblysy Vıatskoe aýylynan keldik. О́ńirlerimizdi eki myń shaqyrymdaı qashyqtyq bólgenimen, Álııa Moldaǵulovanyń esimi bizdi berik baılanystyryp tur. Iаroslavl jerinde onyń esimi zor qurmetpen atalady: Batyrlyq memorıalynda esimi qashalyp jazylǵan, aýyl mektebinde qujattar men fotosýretter qoıylǵan arnaıy mýzeı ashylǵan. 1942 jyly Álııa bizdiń mektebimizde 7-synypta oqydy, sondyqtan biz ony zor maqtanyshpen ózimizdiń túlek dep ataımyz. Vıatskoe aýylyna kelgen árbir týrıst Álııanyń erligi jaıly biledi. Onyń beınesi aýylymyzdyń mádenı-tarıhı ómiriniń ajyramas bólshegine aınaldy», – dedi Lıýbov Abramova.
Shara sońynda halyq mahabbaty men alǵysyna bólengen, 50 jyldyq tarıhy bar «Álııa» áni shyrqaldy. Ándi sahnada ánshi Mereı Samurat tebirene oryndap, kórermenderdiń zor qoshemetin ıelendi.
Forým – urpaqtar sabaqtastyǵynyń, tájirıbe almasýdyń jáne Álııa Moldaǵulovanyń erligin ulttyq tarıh pen maqtanyshtyń ajyramas bóligi retinde dáripteýdiń mańyzdy alańyna aınaldy.
