«Qytaı – Ortalyq Azııa» atty ekinshi Indýstrııalyq-ınvestısııalyq yntymaqtastyq forýmy aıasyndaǵy mańyzdy oqıǵalardyń biri – Almaty oblysynyń ákimdigi men Qytaıdyń «Yili Chuanning Biological Co.» kompanııasy arasynda yntymaqtastyq týraly memorandýmǵa qol qoıylýy boldy. Osynyń nátıjesinde Eńbekshiqazaq aýdanynda júgeri men bıdaıdy tereń óńdeýge baǵyttalǵan agroónerkásiptik park ashylady.
Almaty oblysynyń ákimdigi agroónerkásiptik sektorǵa strategııalyq ınvestorlardy tartý boıynsha júıeli jumystardy jalǵastyryp keledi. Atalǵan kompanııa Qytaıdyń jetekshi bıofarmasevtıkalyq kásiporyndarynyń biri.
Joba aıasynda zamanaýı bıotehnologııalar engizilip, amınqyshqyldar, probıotıkter men bıologııalyq ydyraıtyn materıaldar (onyń ishinde qaptama jáne medısınalyq buıymdar) óndiriledi. Jalpy ınvestısııa kólemi – shamamen 500 mıllıon AQSh dollary. Jobanyń jyldyq óndiristik qýaty – 400 myń tonna júgeri men 500 myń tonna bıdaı, al qurylatyn jańa jumys oryndarynyń sany 1 000 adamǵa deıin jetýi múmkin.
Kásiporyn «Shelek» ındýstrııalyq aımaǵynda ornalasady. Qazirgi ýaqytta kompanııa mamandary jobany kezeń-kezeńimen iske asyrý strategııasyn ázirleýmen qatar, óndiristik alańnyń ınfraqurylymy, logıstıkasy jáne ekonomıkalyq parametrleri boıynsha keshendi taldaý jumystaryn júrgizip jatyr.
Almaty oblysy
