Kezdesý barysynda Máýlen Áshimbaev dıplomatty Sıngapýrdyń aldaǵy Táýelsizdik kúnimen quttyqtap, atalǵan elde qolǵa alynǵan ózgeristerge joǵary baǵa berdi. Sondaı-aq ol Qazaqstan men Sıngapýr arasyndaǵy baılanysty nyǵaıtý isinde eki el basshylarynyń dostyq qarym-qatynasy úlken ról atqaryp otyrǵanyn, sonyń nátıjesinde búginde kóptegen salada mańyzdy kelisimderge qol jetkizilgenin atap ótti.
Suhbat kezinde ekijaqty qarym-qatynasty, onyń ishinde parlamentaralyq yntymaqtastyqty nyǵaıtý barysy da sóz boldy.
«Keıingi jyldary eki eldiń yntymaqtastyǵy qarqyndy damyp keledi. Sıngapýr Prezıdenti Halıma Iаkob 2023 jyldyń mamyr aıynda Ortalyq Azııaǵa jasaǵan alǵashqy saparyn Qazaqstannan bastady. Byltyr Qazaqstan Prezıdenti Qasym-Jomart Toqaev Sıngapýrǵa 20 jylda alǵash ret memlekettik saparmen bardy. Bul saparlar seriktestigimizdi nyǵaıtýǵa ózara múddeli ekenimizdi jáne bul baǵyttaǵy zor áleýetimizdi kórsetedi. Biz sizdiń elderińizdiń zańnamalyq baǵyttaǵy tájirıbelerine erekshe qyzyǵýshylyq tanytyp otyrmyz. Qazaqstan Parlamentiniń eki palatasynda da Sıngapýrmen dostyq toptary jumys isteıdi. Muny depýtattar arasyndaǵy yntymaqtastyqtyń mańyzdy tetigi dep qabyldaımyz. Aldaǵy ýaqytta olardyń áleýetin belsendi paıdalaný aıryqsha mánge ıe», dedi M.Áshimbaev.
Kezdesýde rýhanı dıplomatııany ilgeriletý jolynda kúsh biriktirýdiń mańyzyna da mán berildi. Suhbattasýshylar Qazaqstannyń bastamasymen uıymdastyrylyp kele jatqan Álemdik jáne dástúrli dinder kóshbasshylarynyń sezi men Sıngapýr ótkizetin Halyqaralyq uıymshyl qoǵamdar konferensııasynyń maqsattary jáne kóteretin máseleleri uqsas ekenine nazar aýdardy. Eki irgeli forým da mýltıkýltýralızm, ınklıýzıvtilik jáne qoǵamnyń birligi sııaqty qundylyqtardy dáripteıdi.
Sonymen qatar taraptar saýda-ekonomıkalyq, ınvestısııalyq, ınfraqurylymdyq yntymaqtastyq máseleleri jóninde pikir almasty jáne energetıka, logıstıka, sıfrlandyrý sııaqty irgeli baǵyttarǵa qatysty birlesken mindetterdi belgiledi. Is-sharada aıtylǵandaı, qazirgi tańda elimizde 150-ge jýyq birlesken Qazaqstan-Sıngapýr kásiporny tabysty jumys istep keledi.
Sondaı-aq Máýlen Áshimbaev dıplomatqa Memleket basshysy Qasym-Jomart Toqaevtyń bastamasymen Qazaqstanda júrgizilip jatqan reformalardyń mańyzy jaıynda aıtyp berdi. Bul rette palata spıkeri ekonomıkany ártaraptandyrýǵa arnalǵan jobalarǵa keńinen toqtaldy.
О́z kezeginde Zýlkıflı Baharýdın Qazaqstannyń jahandyq syn-qaterlerdi eńserý, áleýmettik-ekonomıkalyq jáne saıası reformalardy iske asyrý jolynda jasaǵan batyl qadamdaryna joǵary baǵa berdi.
