Foto: Ashyq derekkóz
«Bul – «Qoljetimdi ınternet» ulttyq jobasynyń bir bóligi. Joba eki jarym mıllıon adamdy qamtıdy. Keıbir aýyldarda ınternet bar, biraq onyń sapasy jetkiliksiz. Sebebi úılerde qurylǵylar kóbeıip, ınternetke suranys ósip jatyr», dedi Ekaterına Smyshlıaeva.
Depýtattyń aıtýynsha, joba aıasynda myńnan astam iri aýylda ár úıge deıin talshyqty-optıkalyq baılanys jelisi tartylady. Bul – «sońǵy mıl» dep atalady. Bul baılanys túri – eń jyldam, turaqty jáne qaýipsiz.
«Úılerde symdy ınternet bolǵan jaǵdaıda, otbasynyń baılanysqa jumsaıtyn shyǵyny azaıady. Aýyldaǵy adamdar «aqyldy» qurylǵylardy, smart-tehnıkany megapolıs turǵyndary sııaqty paıdalana alady. Sonymen birge, jer ústi jelilerin keńeıtý arqyly biz tek aýyl ómirin jaqsartpaımyz, sonymen qatar eldiń tehnologııalyq egemendigin nyǵaıtamyz», dedi depýtat.
Kelisim sharttaryna sáıkes, qaryz Japonııanyń ulttyq valıýtasy – ıenmen beriledi. Bul valıýtada bazalyq mólsherleme tómen ári turaqty. Jobany júzege asyrý merzimi naqty kórsetilgen jáne ol qaryzdy tóleý bastalǵanǵa deıin aıaqtalýy tıis.
«Jetkizýshilerdi tańdaý ashyq konkýrs arqyly ótedi. Monopolııaǵa jol bermeý úshin bir kompanııaǵa beriletin qarjy mólsheri shektelgen. Sondaı-aq, jetkizýshiler tarapynan qosymsha qarjylandyrý da qarastyrylǵan», dedi depýtat.
Smyshlıaevanyń aıtýynsha, bul zań jobasy boıynsha jumys toby men Komıtettiń keńeıtilgen otyrysy ótkizilgen, barlyq turaqty komıtetter óz qorytyndylaryn bergen.
«Osyǵan baılanysty, osy Zańdy qabyldaýdy jáne ony Qazaqstan Respýblıkasy Parlamentiniń Senatyna jiberýdi usynamyz. Qoldaýlaryńyzdy suraımyn. Raqmet», dep qorytyndylady depýtat.
