Ár shahtermen jeke baılanys júıesi ornaıdy
Ortalyq 2024 jylǵy tamyzda Qaraǵandy qalasynda iske qosylǵan jáne qazirdiń ózinde naqty nátıjeler kórsetip otyr. Shahtalarda gaz deńgeıiniń kóterilýine baılanysty bolatyn tótenshe jaǵdaılar sany 43,8%-ǵa azaıǵan. Joba – «Qarmet» kompanııasynyń keń kólemdi sıfrlandyrý baǵdarlamasynyń bir bóligi jáne otandyq DMMS óndiristik basqarý platformasy negizinde jumys isteıdi. Jobanyń negizgi maqsaty – óndiristik qaýipsizdik deńgeıin arttyrý jáne barlyq 8 shahtada basqarýdy jaqsartý. «Qarmet» AQ Turaqty damý jónindegi basqarýshy dırektory Erbol Ismaılovtyń aıtýynsha, jerasty pozısııalaý júıesi qazirdiń ózinde 4 shahtada engizilgen, jyl sońyna deıin barlyq shahtada jumys isteıdi.
«Bul júıe bizge ár shahterdiń qaı jerde ekenin, onyń jaǵdaıyn, jumys ornyndaǵy aýa men jeldetýdiń jaı-kúıin baqylaýǵa múmkindik beredi. Biz jer astyndaǵy ár qyzmetkermen baılanysqa shyǵa alamyz», deıdi E.Ismaılov.
О́ndiristi sıfrlandyrýdyń paıdasy nede?
Kómir departamentiniń bas energetıgi Iýrıı Barkovskııdiń aıtýynsha, ken oryndaryna jarylysqa tózimdi beınebaqylaý júıesi ornatylǵan.
«Ol gazdy ortada da jumys isteıdi. Kameralar baılanysqa qosylǵan sátten sońǵy mınýtqa deıin kórsetedi. Onda qýattaýshy stansalar bar. Munymen qosa, shahtalarǵa kirý týrnıketi men avtomattandyrylǵan medısınalyq qondyrǵylar ornatylǵan. Olar kenshiniń densaýlyǵyn birden tekseredi. Talapqa sáıkes kelmegen jaǵdaıda jer astynda jumys isteýine shekteý qoıylady. Arnaıy termınaldar kenshilerdiń qaýipsizdik týraly bilimin jetildirýin qamtamasyz etedi. Olar synaq tapsyryp, nátıjelerin dereý kóredi», deıdi.
«Alarmphone» ahýaldy túzeıdi
Byltyr Memleket basshysy Qasym-Jomart Toqaev Qaraǵandyǵa saparynda «Qarmet»-tiń dıspetcherlik-taldaý ortalyǵyn aralap kórdi. Prezıdent shahterlerdiń óndiristegi qaýipsizdigin qamtamasyz etý baǵytynda qabyldanǵan tyń sharalarmen tanysty. Memleket basshysy «Saran» shahtasynda, 620 metr tereńdikte jumys istep jatqan kenshilermen beınebaılanys arqyly sóılesti. Kásiporyn jumysshylardy jańa «alarmphone» qurylǵysymen jabdyqtaǵan. Qorǵanys deńgeıi asa joǵary gadjette qyzmetkermen jedel baılanysýǵa arnalǵan smartfon fýnksııasy bar.
Qaraǵandy oblysy
