ASTANA. 16 aqpan. Estý qabileti tómen palýandarymyz Belarýs elinde ótken dodadan 2 altyn, 3 kúmis pen 1 qola medaldi jeńip aldy. Bul týraly «Dene múmkindikteri shekteýli tulǵalarǵa arnalǵan sporttyq daıarlaý ortalyǵy» habarlady.
Sýrdolımpıadashylar arasynda erkin kúresten ótken bul jarys palýandarymyzdyń babynda ekendigin kórsetti. Astanadan attanar aldynda «Osy básekede altyn bastaǵan birneshe júldege qol jetkizýge tıispiz» degen bapker Ernazar Qonysbaevtyń aıtýynsha, elimizden barǵan jeti palýannyń altaýy júldeli oryndy jeńip aldy.
Jyl basyndaǵy alǵashqy jarystan 2 altyn, 3 kúmis pen 1 qola medaldi julyp túsý ońaı emes. Bizdiń jigitter erledi. Nursultan Dúısenbıev pen Ǵabıt Esjanov qarsylas shaq keltirmeı, aqtyq saıysqa súrinbeı jetti. Belarýstiń Bobrýısk qalasynda eki márte Qazaqtyń ánurany shyrqalyp, eki dúrkin Kók baıraǵy aspandap turdy.
Baǵdat Sábıtov, Shonhý Haırathan jáne Rahymberli Qabylbekov fınalda tek kilem ıelerinen utylyp, kúmis medaldi keýdelerinde jarqyratty. Ǵalymbet Moldashev bolsa qola medaldi qanaǵat tutty.
Armenııada 2014 jyly ótken jastar arasyndaǵy álem chempıonatynda grek-rım men erkin kúresinen qatar beldesip, qos kúmis medaldi ıelenip qaıtqan Muhtar Esenǵosulynyń ǵana bul jarysta joly bolmady. Jas palýan tájirıbesiniń azdyǵynan alǵashqy aınalymda-aq jarys jolynan shyǵyp qaldy.
- Ǵabıt Esjanov (65 kılo) – altyn medal.
- Nursultan Dúısenbıev (57 kılo) – altyn medal.
- Baǵdat Sábıtov (74 kılo) – kúmis medal.
- Shonhý Haırathan (125 kılo) – kúmis medal.
- Rahymberli Qabylbekov (97 kılo) kúmis medal.
- Ǵalymbet Moldashev (65 kılo) – qola medal.
