Shúlbi sý qoımasynyń jaǵalaýynda úsh jańa qutqarý beketi ashyldy. Olardyń barlyǵy tolyq jabdyqtalǵan: beınebaqylaý júıeleri ornatylǵan, qutqarý jáne júzý quraldary bar, medısınalyq pýnktter jabdyqtalǵan. Bul yqtımal oqıǵalarǵa jedel den qoıýǵa jáne demalýshylarǵa ýaqtyly kómek kórsetýge múmkindik beredi.
Saltanatty ashylý rásiminde Abaı oblysy TJD bastyǵy Manarbek Shapaǵatov TJD bazasynda arnaıy daıarlyqtan ótken 10 azamattyq qutqarýshyǵa sertıfıkattar tabys etti. Sondaı-aq is-shara aıasynda kórme jattyǵýy ótti: daıyndalǵan qutqarýshylar sýǵa batyp bara jatqan adamdy qutqarý boıynsha is-qımyldaryn kórsetip, kásibı daıyndyqtyń joǵary deńgeıin rastady.
Shyǵys Qazaqstan oblysynda da qosymsha sharalar qabyldandy. Novostroıka aýylyndaǵy Buqtyrma sý qoımasynyń Samara jaǵalaýynda taǵy bir qutqarý beketi jumysyn bastady. ShQO TJD órt sóndirýshileri men jedel-qutqarý jasaǵynyń qyzmetkerleri shomylý maýsymy boıy kezekshilikte bolady.
Beket qutqarý jabdyqtarymen, sonyń ishinde júzý quraldarymen jáne órt sóndirý mashınasymen jabdyqtalǵan. Uzyndyǵy shamamen 110 km jaǵalaýdy patrýldeý qaıyqtarmen júzege asyrylady. Sondaı-aq demalýshylar arasynda da, demalys bazalarynyń ıeleri tarapynan da órt qaýipsizdigi erejeleriniń saqtalýyna monıtorıng júrgiziledi. Demalýshylarmen únemi nusqaýlyqtar ótkizilip, sýda jáne jaǵalaý aımaǵynda qaýipsizdik týraly jadynamalar taratylady.
«Basty mindet – sýdaǵy jazataıym oqıǵalardyń jáne jaǵalaýda ornalasqan obektilerdegi órtterdiń aldyn alý. О́tken maýsymda jedel árekettiń arqasynda órt sóndirýshiler órttiń demalys oryndaryna taralýyna jol bermedi. Júzý quraldaryndaǵy kezekshilik jyldam áreket etýge jáne kómek kórsetýge múmkindik beredi», – dep ShQO TJD bastyǵynyń orynbasary Ishar Savazov atap ótti.
Sonymen qatar shomylý maýsymy bastalǵanǵa deıin TJ qyzmetiniń qyzmetkerleri azamattardyń qaýipsizdigin qamtamasyz etý boıynsha qajetti sharalar tizbesi bar jeke demalys aımaqtarynyń ıelerine usynys hattar tabys etti.
Sý aıdyndarynda qaýipsizdikti qamtamasyz etý jónindegi jumys erekshe baqylaýda jáne jaz maýsymy boıy jalǵasatyn bolady.
