Foto: Erlan Omar
Eńbek jáne halyqty áleýmettik qorǵaý mınıstrliginiń málimetinshe, bıylǵy jyldyń 1 maýsymdaǵy jaǵdaı boıynsha múgedektigi boıynsha MÁJ alatyn azamattar sany shamamen 542,5 myń adamdy, al asyraýshysynan aıyrylý jaǵdaıynda járdemaqy alýshylar sany 198,1 myń adamdy quraǵan.
Esterińizge sala keteıik, múgedektigi boıynsha járdemaqy mólsheri múgedektik toby men sebebine jáne jyl saıyn bekitiletin eń tómen kúnkóris deńgeıine (ETKD) baılanysty esepteledi. Asyraýshysynan aıyrylý boıynsha járdemaqy da asyraýyndaǵy adam sany men qaıtys bolý sebebine qaraı belgilenedi.
Sonymen qatar, áleýmettik táýekelderge tap bolǵan jaǵdaıda mindetti áleýmettik saqtandyrý júıesine qatysýshylarǵa MÁSQ-dan qosymsha áleýmettik tólemder tólenedi. Bıylǵy 1 maýsymdaǵy málimetke sáıkes, 93,2 myń adam eńbekke qabilettiliginen aıyrylý boıynsha, al 64,2 myń otbasy asyraýshysynan aıyrylý boıynsha áleýmettik tólem alǵan.
Bul tólemderdiń kólemi azamattyń sońǵy eki jyldaǵy áleýmettik aýdarymdaryna, eńbekke jaramdylyq dárejesine, asyraýyndaǵy adamdar sanyna jáne júıege qatysý ótiline baılanysty anyqtalady.
«Múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri 2025 jylǵy 1 qańtardan bastap eń tómen kúnkóris deńgeıiniń ulǵaıýyna baılanysty 6,5% - ǵa ósti. QR Úkimetiniń sheshimi boıynsha eńbekke qabilettiliginen aıyrylý jáne asyraýshysynan aıyrylý boıynsha MÁSQ-dan tólenetin tólemderdiń mólsheri de 6,5% - ǵa artty.Máselen, osy jyly jalpy aýrýdan múgedektigi boıynsha MÁJ mólsheri 1-top úshin – 101 702 teńgeni, 2-top úshin – 81 362 teńgeni, 3-top úshin – 55 474 teńgeni quraıdy», delingen habarlamada.
Aıta keteıik, 1 maýsymdaǵy jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 70 245 teńgeni, asyraýshysynan aıyrylý boıynsha – 72 524 teńgeni quraıdy.
