23 maýsym – Memlekettik qyzmetshi kúni. Alǵash bul dataǵa 2003 jyly BUU Bas Assambleıasynyń sheshimimen halyqaralyq mereke mártebesi berildi. Al Qazaqstan ataýly kúndi týra 10 jyldan keıin ǵana bekitip, kásibı túrde 2014 jyldan bastap toılap keledi. Bul – eldi órkendetý jolynda jaýapty mindet júktelgen mamandardyń eńbegin baǵalaıtyn kún. Osy aıtýly merekege oraı Astana qalasynda memlekettik qyzmet júıesindegi adamı resýrstardy basqarýdyń ózekti máselelerine arnalǵan halyqaralyq GovHR forýmy ótti.
Is-sharany Memlekettik qyzmet isteri agenttiginiń tóraǵasy Darhan Jazyqbaı resmı túrde ashty. Keıin qatysýshylar nazaryna Memleket basshysy Qasym-Jomart Toqaevtyń arnaıy forýmnyń ashylýyna oraı joldaǵan quttyqtaý haty usynyldy. Aqordadan jetken lebizdi Prezıdenttiń ishki saıasat máseleleri jáne kommýnıkasııalar jónindegi kómekshisi Arman Qyryqbaev oqyp berdi.
«Qadirli qaýym, sizderdi «GovHR forýmy: jańa júıeler, zamanaýı qyzmetter, tyń sheshimder» atty halyqaralyq jıynnyń ashylýymen quttyqtaımyn. Bul – memlekettik basqarý isin jetildirý jáne adam kapıtalyn damytý máselesin talqylaýǵa arnalǵan biregeı basqosý. Qazir elimizde jan-jaqty reformalar júzege asyrylyp, barlyq salada túbegeıli ózgerister bolyp jatyr. Sondaı-aq jahandyq syn-qaterler, sıfrlandyrý isi men jasandy ıntellekt tehnologııasynyń qarqyndy damýy bizdiń aldymyzda múdde men jańa mindetter qoıyp otyr. Osy oraıda memlekettik qyzmettiń sapasyn arttyra túsý óte mańyzdy. Ol úshin bilikti, eńbekqor ári otanshyl kadrlar qajet. Elimizde bul baǵytta aýqymdy jumys atqarylyp jatyr. Biz shet elderdiń ozyq tájirıbesin muqııat zerdelep, Qazaqstandy órkendetýge qatysty tyń tásilder oılastyrýǵa basa mán beremiz. Bedeldi sarapshylar men mamandar bas qosqan búgingi alqaly jıyn – osynyń aıǵaǵy. Forýmda aıtylatyn ıdeıalar men pikirler kadr saıasatyn barynsha jaqsartýǵa yqpal etedi dep senemin», delingen Memleket basshysynyń quttyqtaý hatynda.
Prezıdenttiń bastamasymen memlekettik basqarý salasynda aýqymdy jańǵyrtý jumystary «Adam memleket úshin emes, memleket adam úshin» irgeli qaǵıdaty negizinde júzege asyrylyp jatyr. Forýmda Darhan Jazyqbaı osy jańa kezeńge aıaq basqan memlekettik qyzmet salasyndaǵy adam kapıtalyn damytý, sıfrlandyrý jáne bıýrokratııalyq kedergilerdi azaıtý, memlekettik apparattyń kásibıligin arttyrý baǵytyndaǵy eleýli ózgeristerdi tizbektedi.
– Byltyr elimizde 2024–2029 jyldarǵa arnalǵan Memlekettik qyzmetti damytý tujyrymdamasy Prezıdent Jarlyǵymen bekitildi. Onyń negizinde «Memlekettik qyzmet týraly» jańa zań jobasy ázirlendi. Mundaǵy maqsat – memlekettik qyzmettiń mıssııasyn, mindetteri men talaptaryn jańasha aıqyndaý bolyp otyr. Eń bastysy, qujat memlekettik qyzmetshilerdiń minez-qulqynyń adamǵa baǵdarlanǵan úlgisin bekitýdi kózdeıdi. Iаǵnı otansúıgishtik, ashyqtyq pen kásibılik, klıentke baǵdarlaný men quqyq buzýshylyqtarǵa tózbeýshilikti qamtıtyn talaptardy zańnamalyq turǵydan bekitý josparlandy. Búginde memleketter úshin tek ornyqty bolý jetkiliksiz. Proaktıvti, kreatıvti jáne ıkemdi bolý qajet. Osy oraıda memlekettik sektordaǵy HR júıesin jańa sapalyq deńgeıge kóterý – strategııalyq basymdyqqa ıe mindet, – dedi MQIA tóraǵasy.
Elimizdiń jańashyldyqtaryn joǵary baǵalaǵan BUU Azamattyq qyzmet jónindegi halyqaralyq komıssııasynyń (ICSC) tóraǵasy, BUU Bas hatshysynyń orynbasary Larbı Djakta forým qatysýshylaryna arnaıy beıne quttyqtaý joldady. Ári ol vıdeo jazbada kadrlyq saıasatta ozyq kózqaras ustanyp otyrǵanymyzdy jáne basqa memleketterge úlgi bola alatynymyzdy erekshe atap ótti.
Negizi memlekettik apparatta áli de júıeleý kerek tustar bar. Ásirese sıfrlyq transformasııa, jasandy ıntellekt, ashyq úkimet konsepsııasy jaýapkershilik júgin arttyrdy. Osy oraıda plenarlyq otyrysta Astana memlekettik qyzmet haby Basqarýshy komıtetiniń tóraǵasy Álıhan Baımenov qazirgi jahandaný kezinde bılik tarmaqtary eskerý kerek tetikterdi atady.
– Búginginiń basty talaby – memlekettik qyzmettiń korporatıvtik minezin qalyptastyrý. Zaman talabyna saı bolý úshin eń áýeli Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasyn tolyq iske asyrý qajet. Sonda ǵana memlekettik apparat elgezek bolady. Odan bólek, eńbek naryǵyna engen Z jáne Y býyn ókilderiniń erekshelikterin eskere otyryp, dástúrli basqarýshylyq mansaptyq traektorııamen qatar, daryndy jastar úshin kásibı damý jolyn usyný qajet. Ekinshiden, strategııalyq basymdyqtar qysqamerzimdi jetistikter tasasynda qalyp qoımaýǵa tıis. Osy oraıda memlekettik organdar jumysynda sabaqtastyqty qamtamasyz etý úshin aǵa býyn memlekettik menedjerler korpýsyn kúsheıtý – asa mańyzdy mindet. Úshinshiden, memlekettik qyzmetti eńbek naryǵynda tartymdy jumys orny retinde qalyptastyrý jáne qoǵamnyń senimin arttyrý úshin tıimdi kommýnıkasııany strategııalyq HR-qural retinde qarastyrý qajet. Sonymen qatar adam resýrstaryn damytý salasyndaǵy ortaq máselelerdi eskere otyryp, aımaq elderiniń birlesken ǵylymı zertteý jobalaryn júzege asyrý ózara yntymaqtastyqty jańa sapalyq deńgeıge kótere alady, – dedi Á.Baımenov.
Halyqaralyq jıynnyń paneldik sessııalarynda strategııalyq HR-júıesin qalyptastyrý, kadr saıasatyn sıfrlandyrý, jasandy ıntellektini engizý, jas mamandardy qoldaý jáne memlekettik organdardaǵy basshy rólin transformasııalaý syndy tórt negizgi baǵytqa basymdyq berildi.
Memlekettik qyzmet isteri agenttiginiń bastamasymen uıymdastyrylǵan halyqaralyq jıynǵa tájirıbe almasý maqsatynda BUU ókilderi, Qatar Memlekettik qyzmet jáne kadrlyq áleýetti damytý bıýrosynyń dırektory Saıf ál-Kaabı, Mońǵolııa Memlekettik qyzmet isteri jónindegi keńestiń tóraǵasy Sedevsýren Lhagva, Serra-Leone eliniń Adamı resýrstardy basqarý keńsesiniń bas dırektory Ansý Taker, Tájikstan Respýblıkasy Prezıdenti janyndaǵy Memlekettik qyzmet agenttiginiń dırektory Ilıos Idrıszoda, sondaı-aq AQSh, Ázerbaıjan, BAÁ, Qyrǵyzstan, Marokko, Ońtústik Koreıa, О́zbekstan, Reseı, Rýanda, Sıngapýr, Túrikmenstan sııaqty áriptes elderdiń ýákiletti organdarynyń basshylary, jetekshi mamandary jáne sarapshylary qatysty.
– Qazir búkil álemde, sonyń ishinde meniń elim Rýandada da memlekettik qyzmet salasy aýqymdy transformasııa kezeńin bastan ótkerip jatyr. Sıfrlandyrý, demografııalyq ózgerister jáne qazirgi zaman talaptary eskerilgen osyndaı halyqaralyq platformalardyń róli aıryqsha. Biz bul forýmǵa tájirıbe almasyp, ınnovasııalyq sheshimder men damýǵa qol jetkizý joldaryn talqylaý úshin kelip otyrmyz. Reformalardy engizý, olardyń tıimdiligin arttyrý joldaryn únemi izdestirip kelemiz. Ásirese joǵary sapaly memlekettik qyzmet kórsetýge baǵyttalǵan sıfrlyq transformasııa erekshe mánge ıe. Bul salaǵa ınvestısııalar tartý arqyly, mysaly, biz jalaqy júıelerin jetildirý, qyzmetterdi ınternet arqyly usyný, jasandy ıntellektti engizý syndy baǵyttarda naqty nátıjelerge qol jetkizip otyrmyz. Sondaı-aq jasandy ıntellekt negizinde jumys isteıtin aýdarma quraldary, chat-bottar jáne bıometrııalyq júıeler sátti qoldanylyp jatyr. Bul quraldar densaýlyq saqtaý, aýyl sharýashylyǵy sııaqty salalarda tıimdilikti arttyrady, – dedi Rýanda Respýblıkasy Memlekettik qyzmet jáne eńbek mınıstrliginiń turaqty hatshysy Mýsonera Gaspard.
Forým aıasynda jańa kezeńdegi memlekettik basqarý salasyndaǵy halyqaralyq tájirıbe men ǵylymı zertteýlerge negizdelgen «Public Administration in the New Reality» atty kitap tanystyryldy. Bul kitapqa 19 elden 39 avtor qatysqan. Al oǵan alǵysózdi Prezıdent Qasym-Jomart Toqaev jazǵan.
Pikir almasýlar, paneldik jáne forsaıt-sessııalar nátıjesinde memlekettik qyzmet pen adamı resýrstardy basqarý júıesin damytýǵa arnalǵan negizgi usynystar men baǵdarlardy qamtıtyn GovHR qarary qabyldandy.
