Foto: Joǵarǵy Sot
Prezıdent «Zań jáne tártip» qaǵıdatyn qoǵamnyń ishki mádenıetimen tyǵyz baılanystyra otyryp, ony el damýynyń negizgi irgetasy retinde atady. Ol azamattardyń quqyqqa qurmetpen qaraýy – eldegi turaqtylyq pen tártiptiń basty sharty ekenin atap ótti.
«Zań jáne tártip» qaǵıdaty jaýapkershilikti seziný mádenıetimen tyǵyz baılanysty. Elimizde «Taza Qazaqstan» jalpyulttyq naýqany júrip jatqanyn bilesizder. Bul mańyzdy bastama halyqtyń keń qoldaýyna ıe boldy. «Taza Qazaqstan» – ozyq oıly qoǵam qurýǵa arnalǵan ıdeologııalyq tuǵyrnamanyń ajyramas bóligi. Bul – tek qorshaǵan ortanyń tazalyǵyn emes, oı men sana tazalyǵyn saqtaý degen sóz. Sebebi qoǵamdyq ádep pen zańǵa degen qurmet aınaladaǵy tazalyqtan bastalady», dedi Memleket basshysy.
Memleket basshysy halyqtyń quqyqtyq saýattylyǵyn arttyrý maqsatynda elimizde alǵash ret «Zań jáne tártip» aptalyǵy jarııalanatynyn málimdedi. Bul apta quqyqtyq mádenıetti nyǵaıtýǵa jáne quqyq qorǵaý organdarynyń bedelin kóterýge baǵyttalǵan.
«Jalpy, halyqtyń quqyqtyq mádenıetin kóterýge jan-jaqty qaraǵan jón. Búgin men «Zań jáne tártip» aptalyǵyn jarııalaýdy uıǵardym. Osy apta qoǵamda zań men tártipti nasıhattaý aptasy bolmaq. Aldaǵy jeti kún quqyqtyq mádenıetti nyǵaıtýǵa, sondaı-aq quqyq qorǵaý organdarynyń abyroı-bedelin arttyrýǵa arnalýy kerek. Alaıda, bul bir rettik aksııa emes. «Zań jáne tártip» aptalyǵyna azamattardyń quqyqtyq sana-sezimin kóteretin mańyzdy, júıeli shara retinde qaraǵan jón», dedi Prezıdent.
Sonymen qatar Prezıdent quqyq buzýshylyqpen kúreste tek saldarmen emes, sebeppen de jumys isteý kerektigin atap ótti. Ol quqyqqa qaıshy áreketterdiń aldyn alý júıesin kúsheıtý qajettigin naqty mysaldarmen túsindirdi.
«Ekinshi. Quqyq buzýshylyqtyń aldyn alý jumystaryn kúsheıtý qajet. Qylmys oǵan qolaıly jaǵdaı jasaǵan jerde órshıdi. Qylmystyń jáne zańǵa qaıshy áreketterdiń saldarymen ǵana kúresýge bolmaıdy. Qylmysqa túrtki bolatyn sebepterdi aldyn ala anyqtap, joıyp otyrý qajet. Meniń tapsyrmammen «Quqyq buzýshylyqtyń aldyn alý týraly» Zań jobasy ázirlenip, Májilistiń qaraýyna berildi. Jańa zań atalǵan saladaǵy memlekettik saıasatty birizdendirip, profılaktıkalyq sharalarmen qamtylatyn tulǵalardyń sanatyn keńeıtedi. Mundaı zań sózsiz kerek. Sondyqtan meılinshe tez qabyldaý qajet. Parlament depýtattarynan zań jobasyn jyldyń sońyna deıin qarap, qabyldaýdy suraımyn», dedi Memleket basshysy.
Quqyq buzýshylyqtyń aldyn alýda uıymdyq tásil de qaıta qaralýy qajet. Prezıdent Ishki ister mınıstrligi janynan profılaktıkalyq sharalardy úılestiretin derbes bólimshe qurýdy usyndy.
«Zańnamalyq ózgeristermen qatar, uıymdyq qurylymdy da jańǵyrtý qajet. Ishki ister mınıstrligi júıesinde profılaktıkalyq jumystardy úılestiretin derbes bólimshe quratyn ýaqyt keldi. Quqyq qorǵaý organdarynyń tıimdiligin baǵalaý júıesine de ózgeris qajet. Onda quqyq buzýshylyqty eskertý baǵytyndaǵy jumys nátıjesi esepke alynýǵa tıis. Qylmysqa kóbinese turmysy nashar otbasydan shyqqan adamdar barady. Aldyn alý sharalaryn júzege asyrǵanda dál osy sanatqa aıryqsha nazar aýdarǵan jón. Bul rette áleýmettik qorǵaý organdary men jergilikti bılik mańyzdy ról atqarady», dedi Qasym-Jomart Toqaev.
