Foto: Aqorda
«Sizder qylmysqa qarsy kúres pen qoǵamdyq tártipti saqtaý isin ómirlik mıssııa retinde tańdap, adal qyzmet etip kelesizder. Bul – qıyndyǵy kóp bolǵanymen, elge qajetti ári abyroıly jumys. Osy kúrdeli joldy naǵyz otanshyl adamdar tańdaıdy. Sizder ár azamattyń jaıly ómir súrýine, bıznestiń turaqty damýyna, balalardyń baqytty ári alańsyz ósýine orasan zor úles qosyp júrsizder», dedi Prezıdent.
Memleket basshysy iri qalalarmen qatar, shalǵaı aýyl-aımaqtardaǵy qoǵamdyq qaýipsizdikti saqtaý jolynda quqyq qorǵaý organdarynyń eńbegin erekshe atap ótti.
«Elimizdegi iri qalalarmen qatar, shalǵaı eldi mekenderdegi qoǵamdyq qaýipsizdik – quqyq qorǵaý organdary qyzmetkerleriniń tynymsyz eńbeginiń arqasy. Osyndaı turaqtylyq pen tynyshtyqtyń artynda Zań men tártip úshin jasalǵan eren erlik bar. Halqymyz quqyq qorǵaý organdary qyzmetkerleriniń erligin baǵalaıdy, maqtan tutady, árqashanda qoldaıdy. Jaqynda kúshtik qurylymdarymyz Almaty oblysynda iri esirtki zerthanasyn joıdy. Mańǵystaý oblysynda transulttyq deńgeıdegi uıymdasqan qylmystyq top quryqtaldy. Sonyń nátıjesinde esirtki bıznesine myqty tosqaýyl qoıyldy. Arnaıy operasııalarǵa qatysqan mamandar joǵary memlekettik nagradalarmen marapattaldy», dedi Qasym-Jomart Toqaev.
Prezıdent elimizdiń qaýipsizdigi jolynda qyzmet babynda qaza tapqan saqshylardyń erligin eske alyp, olardyń esimi árdaıym halyq jadynda saqtalýy tıis ekenin aıtty.
«Sizderdiń kúndelikti jumystaryńyz qaýip-qaterge toly. О́kinishke qaraı, Táýelsizdik jyldarynda 842 azamat qyzmettik mindetin oryndaý kezinde qazaǵa ushyrady, 4,5 myń adam jaraqat aldy. Búgin biz qaza bolǵan erlerimizdiń jaqyndaryna marapat tapsyramyz. Erjúrek saqshylardyń erligi halyqqa janqııarlyqpen qyzmet etýdiń úlgisi retinde jurtymyzdyń jadynda saqtalýǵa tıis», dedi Memleket basshysy.
