Oral áýejaıyndaǵy jóndeý jumystary sapasyz júrgizilgen

ORAL. 15 aqpan. Oral áýejaınynyń ushý-qoný jolaǵy jónindegi túıitkilder áli sheshilmeı keledi. Bul týraly egemen.kz tilshisi habarlady. Osydan tórt aıǵa jýyq ýaqyt buryn Oral áýejaıynyń ushý-qoný jolaǵyna júrgizilgen kúrdeli jóndeýden keıin munda ushý kestesi qaıtadan qalpyna keltirilgen edi. Alaıda, osy qysqa ýaqyt aralyǵynda jolaqta jaryqtar men jyryqtardyń jáne oıyqtardyń paıda bolǵany anyqtalyp otyr. Áýejaıdyń bas ınjeneri Shamıl Hısmýtdınov bul jaǵymsyz kórinisti jóndeýdiń sapasyz júrgizilgenimen baılanystyrady. Osy máselege baılanysty Oralǵa Investısııa jáne damý mınıstirligine qarasty azamattyq avıasııa komıteti men «KAZaıroprom» AQ ǵylymı jobalaý ınstıtýtynyń mamandarynan quralǵan komıssııa kelgen bolatyn. Solardyń biri, áýejaı bóliminiń bastyǵy Tatıana Ahtıamova ushý-qoný jolaǵy qanaǵattanarlyq jaǵdaıda, sondyqtan ony paıdalana berýge bolady dep esepteıdi. «Paıda bolǵan qýystar ushaqtyń qaýipsizdigine kedergi keltire almaıdy», – deıdi ol. Sondaı-aq merdigerler men tehnıkalyq qadaǵalaýshylardyń málimdeýinshe, aıaǵyna deıin jetkizilmeı qalǵan jikterdi qalpyna keltirý asa qıyn sharýa emes. Tipti, ony qazirgi aqpannyń aıazdy kúnderiniń ózinde qalpyna keltirýge bolady. Tek jaryqtardy jabý úshin arnaýly qospany paıdalaný kerek eken. Olardyń aıtýynsha, tıisti normatıvter sheńberindegi jumystardy atqarý kezinde áýejaıdy jabýdyń qajeti joq. Ony reısterdiń arasyndaǵy ýaqyt ishinde aıaqtaýǵa bolady. Qysqasy, atalǵan komıssııa Oral áýejaıynyń ushý-qoný jolaǵynda paıda bolǵan tesikter men qýystardy buǵan deıin kúrdeli jóndeý jumystaryn júrgizgen «K-Dorstroı» AQ merdigerlik uıymynyń esebinen qalpyna keltirý jóninde sheshim aldy. Bul úshin áýejaıdy jabýdyń nemese reısterdi shekteýdiń qajettiligi joq ekendigi jóninde uıǵarym jasaldy. Bul arada tıisti zańdylyqtar boıynsha sońǵy jaýapkerishilikti áýejaı jetekshileri arqalaıtynyn aıta ketken jón. Temir Qusaıyn. Derek: egemen.kz. Sýret: forbes.kz.