Aýdan ákimdiginiń málimetine súıensek, jobanyń basym bóligin Qulsary qalasynda iske asyrý josparlanǵan.
«Bıyl Qulsary qalasynda joldardy qaıta jańǵyrtýdyń tórtinshi kezeńi bastaldy. Bul jobada 75,2 shaqyrym jol jańǵyrtylady. Sý tarazartý jáne kótergish sorǵy stansalaryn salý josparlanyp otyr. Monoqalanyń ár bóliginde jaıaý júrginshilerge arnalǵan trotýar men velojol salynady» dep habarlady ákimdiktiń baspasóz qyzmeti.
Monoqaladaǵy «Barlaýshy» shaǵyn aýdanynda dene shynyqtyrý-saýyqtyrý keshenin, ólekseler molasyn salý kózdelgen. Sondaı-aq, I.Taımanov kóshesindegi 25 metrlik, U.Ábdrahmanov kóshesinde 29,4 metr kólik kópirine kúrdeli jóndeý júrgiziledi.
Sondaı-aq, Aqkıiztoǵaı tarıhı mekenine deıingi 34,8 shaqyrym jol jańǵyrtylady. Bul – Beket atanyń kindik qany tamǵan meken. Munda onyń atasy Janaly, ákesi Myrzaǵul men anasy Jánııa, uly Toǵaı máńgilik tynystaǵan.
