Mekteptiń basty ereksheligi – dástúrli oqý júıesinen bólek, óz qarqynyńmen, óz ýaqytyńmen oqýǵa múmkindik berýi. Astana Hub aýmaǵynda ornalasqan kampýs táýlik boıy ashyq, al oqý prosesi tájirıbege negizdelgen. 18 aıdyń ishinde stýdentter 50-den astam jobany júzege asyryp, Python, JavaScript, Golang, Rust sııaqty 20 shaqty baǵdarlamalaý tilin meńgeredi. Baǵdarlamany támamdaǵan soń, árkim óz baǵytyn tańdaıdy: biri – AI ınjenerine, biri – oıyn jasaýshyǵa, endi biri DevOps nemese kıberqaýipsizdik mamanyna aınalady.
Oqý – tek kod jazý emes. Munda biri – aǵylshyn tilin úıretse, biri – kópshilik aldynda sóıleýge baýlıdy, endi biri AI quraldaryn bızneste qalaı qoldanýǵa bolatynyn kórsetedi. Qaýymdastyqtyń kúshi – dál osy ózara tájirıbe almasýda jatyr.
Tomorrow School-da oqyp jatqan stýdentterdiń jas ereksheligi men tájirıbesi ártúrli. Máselen, Stanıslav Kýleshov – 18 jasta. Buǵan deıin baǵdarlamalaýmen aınalyspaǵan ol búginde Telegram Mini App arqyly tapsyrys qabyldaıtyn qosymsha jasap, tipti sheteldik tapsyrys ta alyp úlgergen.
Azamat Jeńisov – 20 jastaǵy AITU stýdenti. Kıberqaýipsizdik mamandyǵynda oqyǵanymen, naqty tájirıbeni dál osy mektepten alyp jatqanyn aıtady. Ol tipti aǵylshyn tilinen oqý klýbyn ashyp, óz bilimin basqalarmen bólisip keledi.
Al Ámir Jaqyshev – ekonomıst, 36 jasta. On jyldan astam dástúrli kásippen aınalysqan ol IT salasyn múlde jat kórgen. Alaıda peer-to-peer formatymen tanysqannan keıin kózqarasy ózgerip, búginde ol da jańa baǵytta damyp keledi. Qazir ol kópshilik aldynda sóıleý klýbyn júrgizip, Astana Hub-tyń akselerasııalyq baǵdarlamasyna qatysýda.
Mereke Qurmashevtiń oqıǵasy – naǵyz ómirlik betburystyń mysaly. Buryn syrtqy jarnama salasynda qyzmet etken ol 30 jasynda mamandyǵyn túbegeıli ózgertip, IT-ge bet burǵan. Birneshe aı ishinde ol neırojelilerdi qoldanatyn jeke bıznes ashyp, alǵashqy klıentterin de tapty.
Mektep janynda 13 stýdenttik klýb jumys isteıdi. Bul – stýdentterdiń óz bastamasymen qurylǵan: AI Tools Club, Kazakh Club, LeetCode Club, Chess Club, Debate Club syndy klýbtarda sabaqtar ótip, kóshbasshylyq daǵdylar qalyptasady.
Tomorrow School ortasy tek kampýs sheńberinde qalmaıdy. Stýdentter fýtbol, shahmat týrnırlerin uıymdastyryp, hakatondarǵa qatysyp, Astana Hub-tyń jetekshi tulǵalarymen jeke kezdesýlerge shaqyrylady. Bul – olardyń belsendiligi men damýǵa degen yntasynyń naqty kórsetkishi.
Qazir Tomorrow School-dyń jetinshi legine tirkelý júrip jatyr, al ótinim qabyldaý 18 shildege deıin jalǵasady.
