Máselen, keshe «Amanat» partııasy fraksııasynyń depýtattary «Qazaqstan avıasııa ındýstrııasy» zaýytynyń jaǵdaıyn baqylap qaıtty. Strategııalyq mańyzy bar nysan – byltyr aqpannan beri daǵdarysta. Búginde eldegi jalǵyz avıasııalyq-tehnıkalyq ortalyqtyń jumysy shatqaıaqtap, 164 qyzmetker jumystan ketken, olardyń 76-sy – joǵary bilikti óndiristik mamandar. Angarda turǵan alty ushaq ta bes jyldan beri áýege kóterilmegen. Tipti esepshottary men múlki buǵattalǵan.
– Zaýyt jylyna onǵa deıin kúrdeli jóndeý júrgizýge qaýqarly. Biz jeńildik surap otyrǵan joqpyz. Bizge jumys isteýge múmkindik berilse jetkilikti. Bul zaýytta elimiz uzaq jyldar boıy daıarlaǵan mamandar shoǵyrlanǵan. Barlyq qajetti qural-jabdyq, bilim, óndiristik tizbek bar. Alaıda biz qazirdiń ózinde júzden asa mamannan aıyryldyq. Eger jaǵdaı ózgermese, zaýyttan da aıyrylyp qalamyz. Al onymen birge otandyq avıaónerkásiptiń negizin quraıtyn barlyq áleýet te joǵalady, – deıdi «Qazaqstan avıasııa ındýstrııasy» JShS bas dırektory Qaırat Jaýhanov.
Zaýytta mamandar da, sertıfıkattalǵan qural-jabdyqtar men ınfraqurylym da bar. Biraq memleket tarapynan júıeli qoldaý men zaýyttyń bolashaǵyna qatysty naqty sheshim jetispeıdi. Depýtattar bul máseleni jaýapty memlekettik organdardyń deńgeıine deıin kóterýdi kózdep otyr.
– Memleket basshysy naqty aıtty: óndiristik qýattardy arttyryp, shaǵyn avıasııany damytý qajet. Otandyq kásiporyndarǵa qoldaý kórsetý kerek. Bul zaýyt osy mindetterdi oryndaýǵa tolyq qaýqarly. Biraq qazir zaýyt jumys istemeı tur. Sebebi ol dármensiz emes, ony tyǵyryqqa tiregen. Tapsyrystyń joqtyǵy, jerge qatysty daýlar men der kezinde ótelmegen qaryzdar – munyń bári uıymdastyrýshylyqtyń joqtyǵyn kórsetedi. Elimizdiń tehnıkalyq avıasııasyn qaıta kókke kóterýge, qorǵanys áleýetin kúsheıtýge qaýqarly zaýyttyń salǵyrttyqtyń kesirinen jabylyp qalýyna jol bermeımiz. Bul máseleni Parlamentte de kóterdik. Endi naqty merzimi men mindettemeleri bar sheshimderdi talap etemiz, – dedi Májilis depýtaty, «Amanat» partııasy fraksııasy jetekshisiniń orynbasary Pavel Kazansev.
Al Shyǵys Qazaqstanǵa aıaq basqan májilismen Erlan Saırov óńirdegi jańa mekteptiń qurylys barysyn tekserdi. О́skemen qalasy I.Esenberlın kóshesindegi 600 oryndyq bilim ordasy «Amanat» partııasynyń saılaýaldy baǵdarlamasy men «Keleshek mektepteri» ulttyq jobasy aıasynda salynyp jatyr. Munda zaman talabyna saı hımııa jáne robottehnıka kabınetteri, kitaphana, lıft, ashana, ınklıýzıvti orta, pandýstar men taktıldi jolaqtar qarastyrylǵan.
– Degenmen osyndaı bilim ordasynda yntaly, bilikti muǵalimder jumys istemese, bul istiń máni shamaly. «Pedagog mártebesi týraly» zań arqyly keıingi jyldary tek jalaqyny kóterip qana qoıǵan joqpyz, mektepke úzdikterdi tartýǵa, olardy damytýǵa múmkindik beretin jaǵdaı jasadyq. Bul – sapaly bilim berýdiń berik irgetasy, – dedi depýtat E.Saırov.
Qys mezgilinde tarazdyqtar jylýsyz qalmaýy úshin Májilis depýtattary Muqash Eskendirov pen Gúldara Nurymova Taraz qalasyndaǵy M-1 jylý magıstralin jańartý jobasynyń júzege asyrylý barysyn baqylady. 1990 jyly salynǵan bul magıstraldiń negizi paıdalaný merzimi ótken. 2023 jyldyń basynda tozý deńgeıi 80 paıyzǵa jetken edi.
Qazir Tarazda jylý jelilerin jańartý jumystary júıeli jalǵasyp jatyr. О́tken jyly 4 602 metr qubyr aýystyrylsa, bıyl jyl aıaǵyna deıin taǵy 1 536 metri jańartylady.
– Adamdardyń ómir súrý sapasyn arttyrý úshin eń aldymen úılerde jylý, ystyq sý jáne káriz júıesiniń durys jumys isteýi qajet. Tarazda jylý jelileri máselesi ondaǵan jyl boıy sheshilmeı kelgen. Endi buǵan kóz juma qaraýǵa bolmaıdy. Turǵyndar qys mezgilinde jylýdan taryqpaı ómir súrýi kerek, – dedi depýtat M.Eskendirov.
Májilis depýtaty Ekaterına Smolıakova Almaty oblysyndaǵy Talǵar jáne Qonaev qalasynda bolyp, jergilikti kásipkerlermen kezdesti. Júzdesýde ishki týrızmdegi kúrmeýli máselelerdi talqylady. Buǵan deıin «Respublica» partııasy fraksııasynyń múshesi Premer-mınıstrge saýal joldap, ishki týrızmdi retteý, naryqty zańsyz básekeden qorǵaý jáne zańnamany jańǵyrtý qajettiligi jóninde ótkir máselelerdi kótergen edi.
– Týrızm – jaı ǵana demalys emes, bul eldiń kelbeti, jumys oryndary, ınvestısııa tartý jáne óńirlerdiń ósý núktesi. Eger biz onyń shynymen de ekonomıkanyń qozǵaýshy kúshi bolǵanyn qalasaq, onda bızneske damýǵa múmkindik berýimiz qajet, – dedi E.Smolıakova.
Halyq amanatyn arqalaǵan depýtattar ár aımaqtyń problemasymen jaqyn tanysýdan bólek, saılaýshylarǵa qabyldanǵan zańdardyń mən-jaıyn jete túsindirip júr. Olardyń óńirlerge sapary shilde aıynyń 10-yna deıin jalǵasady.
