Jalpyǵa birdeı deklarasııalaý – árbir azamattyń tabysy men múlki týraly memleket aldynda esep berýi. Ol eki túrli salyq deklarasııasynan turady: birinshisi – kirister men múlik týraly, ekinshisi – tabystar men shyǵystar týraly esep.
Alǵashqysy – 250.00 nysany. Bul nysandy ár azamat ómirinde bir-aq ret tapsyrady. Onda siz óz atyńyzdaǵy múlikterdi – úı, kólik, jer, sheteldegi aktıvter, bank shottary, tipti úı ishindegi baǵaly zattarǵa deıin kórsetýińiz qajet. Mysaly, páter ishindegi jıhaz, óner týyndylary, kolleksııalaryńyzdyń naryqtyq quny joǵary bolsa, kórsetilgeni abzal.
Bıyl 250.00 nysanyn 18 jasqa tolǵan barlyq azamat 15 qyrkúıekke deıin tapsyrýy kerek. Eskeretin jaıt bar. Eshqandaı jas shekteýi joq. 100 jasqa kelgen qarııa da, stıpendııamen kún kórip júrgen stýdent te tapsyrady. Zań talaby osyndaı. Ýaqytynda tapsyrmaǵan jaǵdaıda salyq organdary salyq tóleýshiniń jeke kabınetine eskertý jiberedi. Alaıda kópshilik bul kabınetti kún saıyn qarap otyrmaıdy. Sol sebepti, eskertý jaýapsyz qalyp, saldary qıyn bolýy múmkin. Azamattyń banktegi shottary buǵattalyp, zeınetaqysy nemese shákirtaqysy toqtap qalýy yqtımal. Mundaı jaǵdaılar ótken jyldary bolǵan, sondyqtan aldyn ala qamdanǵan durys.
250.00 nysanyn tapsyrý joldary ártúrli. E-Salyk mobıldi qosymshasy arqyly, HQKO-da ınspektor kómegimen nemese jeke býhgalter kómegimen tapsyrýǵa bolady. Bul – ómirde bir ret tapsyrylatyn esep. Odan keıin jyl saıyn 270.00 nysanyn, ıaǵnı tabystar men shyǵyndar deklarasııasyn tapsyrý jalǵasady.
Keıingi kezde jelide «8 mıllıon otandasymyz deklarasııa tapsyrmasa bolady» degen aqparat tarap júr. Bul – 270.00 deklarasııasyna qatysty jeńildik. Alaıda 250.00 nysany bárine mindetti. Sondyqtan jańa jyldy buǵattalǵan bank kartasymen qarsy alǵyńyz kelmese, deklarasııany bıyldan bastap zerttep, qazirden qamdanyńyz.
Daıyndaǵan –
Eligimaı TО́ŃKER,
«Egemen Qazaqstan»
