Qurylys aıaqtalǵan soń mekemede jyl saıyn 1500-1800 adamǵa medısınalyq qyzmet kórsetiledi. Keshen táýlik boıy em-dom alýǵa jáne ońaltýdyń barlyq qajetti túrine qol jetkizýge múmkindik beredi. Alaıda jobany qaıta pysyqtaý men qarjylandyrýdyń jetkiliksizdigine baılanysty ortalyq 2027 jyly ǵana paıdalanýǵa beriledi dep josparlanyp otyr.
«Osyndaı ońaltý ortalyqtarynyń boı kóterýi – óńirlerdegi múmkindigi shekteýli azamattardyń qyzmetterge qoljetimdiligin keńeıtý jolyndaǵy úlken qadam. Mundaı mekemeler erekshe qajettilikteri bar jandardyń densaýlyǵyn qalpyna keltirip, ómir sapasyn jaqsartýǵa múmkindik beredi. Biz Prezıdent tapsyrmalarynyń merziminde oryndalýyn, myńdaǵan otbasy úmitiniń aqtalýyn qadaǵalaımyz. Oblys ortalyǵynda ómirlik mańyzy bar nysannyń jyldar boıy iske qosylmaýy aqtaýǵa kelmeıdi. «AMANAT» partııasy jaǵdaıdy túzeý úshin naqty sharalar qabyldanýyn, al tapsyrmanyń merziminde oryndalmaýyna jaýapty tulǵalardyń anyqtalyp, jaýapqa tartylýyn talap etetin bolady. Mundaı nysandar bos turmaı, halyq ıgiligine qyzmet etýi tıis», dedi depýtat N.Dementeva.
Májilistiń baspasóz qyzmetiniń málimdeýinshe Kókshetaýdaǵy joba partııanyń «Kedergisiz keleshek» baǵdarlamasy sheńberinde júzege asyrylyp jatyr. Baǵdarlama nysandar salýmen ǵana shektelmeı, qalalyq ortany jan-jaqty beıimdeýdi de qamtıdy. Tek Aqmola oblysynyń ózinde 1037 nysan, sonyń ishinde mektepter, aýrýhanalar, murajaılar, sport zaldary zamanaýı talaptarǵa saı jańartylǵan. Aldaǵy bir jarym jylda bul tizimge taǵy 176 ǵımarat qosylady. 2027 jylǵa deıin oblys boıynsha 958 nysandy beıimdeý josparlanǵan. Olarǵa pandýstar ornatý, taktıldi kórsetkishter, arnaıy lıftiler qoıý sııaqty jumystar júrgiziledi.
О́ńirde ınklıýzıvti bilim men sportqa da aıryqsha kóńil bólingen. Mektepterde erekshe bilim berý qajettilikteri bar balalarǵa jaǵdaı jasalyp, olardyń otbasylaryna naqty kómek kórsetilip keledi. Sonymen qatar ınvataksı qyzmetin damytý, zeınetkerler men múgedektigi bar azamattarǵa tegin jol júrý múmkindigin usyný qolǵa alynǵan. Qazirgi ýaqytta mundaı sharalar Kókshetaý men Býrabaıda júzege asyp jatyr.
