Qazirgi tańda «Astana Hub»-ta «Playrix», «TikTok», «inDrive», «EPAM», «Glovo», «Presight.ai» sııaqty iri halyqaralyq kompanııalardyń keńseleri ornalasqan. Sondaı-aq byltyr ınfraqurylym Iаndeks, «Telegram», «Higgsfield», «Naimi.kz», «Funtyx Games» jáne naryqtyń basqa da iri oıynshylarymen tolyqty. О́ńirlerde 450 startap-ıdeıa ázirlenip, 186 IT-kompanııa «Astana Hub» tehnologııalyq ekojúıesiniń bir bóligine aınaldy.
«IT-sala ekonomıkanyń basqa baǵyttarymen salystyrǵanda orasan zor ósim kórsetip keledi. Byltyr ınvestısııa 40%-ǵa, IT-qyzmetter eksporty 52%-ǵa, salanyń jalpy tabysy 48%-ǵa ósti, al jumys oryndarynyń sany 12%-ǵa artty. Bul jetistikter, bir jaǵynan, memlekettik qoldaýdyń tıimdi modeliniń arqasynda múmkin bolyp otyr. Basymdyq adam kapıtalyn damytýǵa qoıyldy. Keıingi 5 jylda memleket «Astana Hub»-qa 15 mlrd teńgege jýyq qarajat saldy, al onyń qaıtarymy retinde IT-salasynan 1,5 trıllıon teńge tabys pen 1,1 mlrd dollar taza eksporttyq kiris aldy. Osylaısha, mınımaldy salymmen IT-sektor úlken serpilis jasady», dedi «Astana Hub» bas dırektory Maǵjan Mádıev.
Byltyr «Astana Hub» bazasynda elimizdegi alǵashqy jasandy ıntellekt mektebi – «Tomorrow School» ashyldy. Munda bilim alýshylar baǵdarlamalaýdyń qyr-syryn meńgerip, qaýymdastyqtar quryp, oqý klýbtaryn uıymdastyryp, ózara tájirıbe almasady. Aldyńǵy jyly bul mektep alty irikteý kezeńin ótkizip, oǵan shamamen myńǵa jýyq adam qatysty. Qazirgi tańda negizgi oqý baǵdarlamasynda 216 stýdent bilim alyp jatyr. Qatysýshylar birqatar mamandyqty tańdaı alady, sonyń ishinde AI-ınjeneri, baǵdarlamalyq jasaqtamany, mobıldi qosymshany ázirleýshi, «DevOps» ınjeneri, IT júıeleriniń arhıtektory, kıberqaýipsizdik mamany atanýǵa múmkindik bar.
«Tomorrow School»-dyń oqý úderisi «Astana Hub» bazasynda oflaın túrde ótedi. Mektep táýlik boıy jumys isteıdi, ıaǵnı ár stýdent ózine yńǵaıly ýaqytta, óz qarqynymen bilim alady. 18 aı ishinde olar 50-den astam jobany júzege asyryp, «Python», «JavaScript», «Golang, Rust» sekildi 20-ǵa jýyq baǵdarlamalaý tilin meńgere alady. Baǵdarlama sońynda ár stýdent óz baǵytyn tańdaıdy, olar AI-ınjener, oıyn jasaýshy, DevOps-ınjener nemese kıberqaýipsizdik mamany atanady.
Segiz aıdyń ishinde «Tomorrow School»-da myqty qaýymdastyq qalyptasty. Bul jerde stýdentter tek óz bilimin jetildirýmen ǵana shektelmeıdi. Atap aıtqanda, biri aǵylshyn tilin úıretse, endi biri kópshilik aldynda sóıleý sheberligine nemese AI quraldaryn bıznes salasynda qoldanýǵa baýlıdy. Bilim alýshylardyń jas aıyrmashylyǵy, mamandyqtary men tájirıbesi áralýan. Dese de, barlyǵyn bir arnaǵa toǵystyratyn ortaq maqsat bar. Ol – IT salasynda óz ornyn taýyp, jańa daǵdyny ıgerý.
Jasandy ıntellekt mektebindegi eń jas stýdentterdiń biri – Stanıslav Kýleshov. Ol nebári 18 jasta. Stýdent S.Seıfýllın atyndaǵy Qazaq agrotehnıkalyq ýnıversıtetinde bilim alady. «Tomorrow School»-ǵa kelgenge deıin onyń baǵdarlamalaý boıynsha tájirıbesi bolmaǵan. Alaıda negizgi daǵdylardy meńgerip, ony is júzinde qoldana bastady. Máselen, Astanadaǵy kofehanalardyń birine onlaın tapsyrys jasaýǵa arnalǵan «Telegram Mini App» qosymshasyn jasap berdi. Sonymen qatar eýropalyq kompanııadan alǵashqy tapsyrysyn da aldy. «Eń bastysy – yqylas pen tabandylyq. Qazirgi tańda júrip ótken jolyma kóz júgirtsem, bul meniń basymnan ótip jatqan oqıǵa ekenine sene alar emespin», deıdi ol tańdanysyn jasyra almaı.
Al osy mekteptiń taǵy bir qatysýshysy Azamat Jeńisovtiń IT salasynda az da bolsa tájirıbesi bolǵan. 20 jastaǵy Azamat Jeńisov – AITU-dyń úshinshi kýrs stýdenti. Ol «Kıberqaýipsizdik» mamandyǵy boıynsha oqıdy. Buryn-sońdy basqa da IT mektepterde bilim alsa da, ártúrli sebepke baılanysty oqýdy sońyna deıin jetkizbegen eken. Al «Tomorrow School»-ǵa kelgende birden qoldaý men shynaıy qyzyǵýshylyqty sezingenin aıtady. Nátıjesinde, ol «Beginner English Club» ashyp, búginde basqa stýdentterge aǵylshyn tilin úırenýge kómektesip júr. Sondaı-aq iri kompanııada tájirıbeden de ótti. «Men kún saıyn ózimdi 1 paıyzǵa bolsyn jaqsartýǵa tyrysamyn», deıdi Azamat.
Keıbir adamdardyń «Tomorrow School»-daǵy joly IT salasyna degen qyzyǵýshylyqtan emes, ózin-ózi taný men ómirdiń mánin izdeý nıetinen bastaý alǵan. Máselen, Ámir Jaqyshev mamandyǵy boıynsha – ekonomıst. Ol 10 jyldan astam ýaqyt dástúrli bıznesti dóńgeletken, ıaǵnı IT salasyna boılamaǵan. «Baǵdarlamalaý óneri – tek erekshe daryny bar adamdarǵa tán dúnıe dep oılaıtynmyn. Biraq «peer-to-peer» formatymen tanysqan soń, bul kózqarasym túbegeıli ózgerdi. Elimizde de dál osyndaı mekteptiń paıda bolǵanyn estigende qýandym. «Tomorrow School» – JI men IT salasynda damýdy qalaıtyndar úshin úlken múmkindik», deıdi 36 jastaǵy Ámir Jaqyshev. Búginde ol «Public Speaking Club»-ty júrgizedi jáne «Astana Hub»-tyń «AI’preneurs» akselerasııalyq baǵdarlamasyna qatysady.
Ár stýdenttiń joly – óz aldyna bir oqıǵa. Búginde mektep janynda «AI Tools Club», «Kazakh Club», «Freelance Club», «Beginner English», «Public Speaking, Startup Club» sııaqty 13 stýdenttik klýb jumys isteıdi. Klýb qatysýshylary sabaqtar ótkizip, ózara tájirıbe almasyp, kóshbasshylyq daǵdylaryn damytady.
«Stýdentter «Astana Hub»-tyń «Startup Garage», «AI’preneurs» sııaqty baǵdarlamalaryna jáne «Decentrathon» hakatonyna qatysady. Al erekshe kózge túskender «Astana Hub» bas dırektory Maǵjan Mádıevpen jeke kezdesýge shaqyrylyp, elimizdiń IT salasyn, startaptardy qoldaý baǵdarlamalaryn birge talqylady», deıdi «Tomorrow School»-dyń komıýnıtı-menedjeri Arýjan Taýbaeva.
Bilim berý alańy odan ári damyp, IT salasynda bilimin jetildirýge nıet bildirgen jandar úshin árdaıym ashyq. Qazir «Tomorrow School»-dyń 7-legine ótinim qabyldaý júrip jatyr. Oqýǵa tirkelý 18 shildege deıin « tomorrow-school.ai» platformasynda qoljetimdi.
