Sýret: lada.kz
150 oryndyq bul nysannyń jalpy aýmaǵy 12 myń sharshy metrden asady. Qurylys aıaqtalǵan soń, jyl saıyn munda 1 500-1 800 adamǵa medısınalyq qyzmet kórsetiledi. Olar keshende táýlik boıy em-dom alýǵa jáne barlyq qajetti ońaltý túrlerine qol jetkizýge múmkindik alady. Alaıda jobany qaıta pysyqtaý men qarjylandyrýdyń jetkiliksizdigine baılanysty ortalyq 2027 jyly ǵana paıdalanýǵa beriledi dep josparlanyp otyr.
– Biz Prezıdenttiń tapsyrmalary men myńdaǵan otbasynyń úmiti aqtalýyn jáne merziminde oryndalýyn qadaǵalaımyz. Oblys ortalyǵynda ómirlik mańyzy bar nysannyń jyldar boıy iske qosylmaýy – eshqandaı aqtaýǵa kelmeıdi. «Amanat» partııasy naqty sharalar qabyldaýdy talap etip, merzimderdiń buzylýyna jaýapty adamdardy anyqtap, jaýapkershilikke tartýdy kózdeıdi, – dedi depýtat.
Al Májilis depýtaty, «Amanat» partııasy fraksııasynyń múshesi Rýslan Qojasbaev óńirlik Jetisý oblystyq fılıalynda qoǵamdyq qabyldaý ótkizdi. Turǵyndar aımaqtaǵy bilim oshaǵynyń tehnıkalyq jaǵdaıyna, ózen arnasyn tazalaýǵa jáne múgedektigi bar adamdarǵa qoljetimdi ári jaıly orta qalyptastyrýǵa qatysty máseleler kóterdi.
– Bilim oshaǵy sonaý 1982 jyly salynǵan. Búginde nysannyń jaǵdaıy óte nashar, oqýshylar úshin asa qaýipti. Tozyǵy jetken mektepte 33 jyl boıy jóndeý jumysy júrgizilgen joq. Aýyl turǵyndary tarapynan aryz-shaǵym jıi aıtylady. Kúrdeli jóndeý júrgizýge qajet jobalyq smetalyq qujat pen saraptama daıyndalyp jatyr. Osyǵan baılanysty jóndeý jumysyna qajet qarajattyń bólinýine yqpal etýińizdi suraımyn, – dedi Panfılov aýdany Úlkenshyǵan aýylynyń turǵyny Toılybaı Dombaǵulov.
О́z kezeginde Májilis depýtaty Rýslan Qojasbaev keıingi 3 jylda óńirde bilim salasyna qatysty 20 nysan salynǵanyn jáne olardyń 15-i bilim oshaǵy ekenin atap ótip, Úlkenshyǵan aýylyndaǵy mekteptiń qazirgi jaǵdaıy da nazardan tys qalmaıtynyn jetkizdi.
Túrkistan oblysyna jumys saparymen barǵan Májilis depýtattary Qaırat Balabıev, Nursultan Baıtilesov, Temir Qyryqbaev, Ulasbek Sádibekov Qaınarbulaq aýyldyq okrýginiń Taskeshý eldi mekeninde «Gen Group Kazakhstan» JShS-nyń banan ósirý jylyjaı keshenin kórip qaıtty. Jalpy alańy 5,3 gektar aýmaqty alyp jatqan nysan TMD keńistiginde alǵashqylardyń biri bolyp tropıkalyq ónimdi jersindirip, banan ósirý isin qolǵa alǵan. Munda jylyna 1 myń tonna ónim alynyp, ishki naryqty qamtamasyz etip otyr.
– Memleket basshysynyń Jarlyǵymen bıyl «Jumysshy mamandyqtary jyly» bolyp jarııalandy. Ataýly jylǵa oraı, kásiporyndardyń, sharýashylyqtardyń jumysymen tanysyp, bolashaǵynan úmit kúttiretin kásibı mamandardy partııalyq qyzmetke tartýdy maqsat etip otyrmyz. Biz óz isiniń bilikti mamandaryna árdaıym qoldaý kórsetemiz. Osydan úsh jyl buryn Májilis tóraǵasy Erlan Jaqanuly jylyjaı sharýashylyqtarynyń jumysymen tanysyp, olardyń ózekti máselelerin tyńdady. Búginde jylyjaı sharýashylyqtaryndaǵy barlyq másele sheshildi deýge bolady. Sala qarqyndy damý jolyna tústi. Oǵan dálel – osyndaı banan ósiretin jylyjaı sharýashylyǵynyń jumysy. Elimizde jańa sý kodeksi qabyldandy, balyq sharýashylyǵyn damytýǵa múmkindik beretin quqyqtyq mehanızmder túzildi. Nátıjesinde, elimiz boıynsha balyq sharýashylyǵy irgeli qadam basyp keledi, – dedi Q.Balabıev.
«Aq jol» partııasy fraksııasynyń múshesi, Májilis depýtaty Azat Perýashev Aqsý elektr stansasyna bardy. Onda kadr daıarlaý, jastardy óndiristik salaǵa tartý men jumysshy mamandyqtarynyń bedelin arttyrý máselesine nazar aýdaryldy.
– Energetıka máselesine biz erekshe kóńil bólip otyrmyz. Burynǵy zamannan mura bolyp qalǵan qýat kózderiniń tozyǵy jetti. Úkimet generasııalyq qýat pen jelilerdi jańartý jáne jańǵyrtý úshin Úkimet rezervinen qarajat bólý týraly birneshe sheshim qabyldady, – dedi A.Perýashev.
