Qurmetti otandastar!
Astana kúni qutty bolsyn!
Bıyl bul mereke Dombyra kúnimen tuspa-tus kelip otyr. Munyń sımvoldyq máni zor. Qazaqtyń qasıetti qara dombyrasy Uly dalanyń myńjyldyq biregeı mádenı murasyn áıgileıdi. Al elordamyz Qazaqstannyń turaqty ári qarqyndy ósip-órkendeýin jáne jasampaz ulttyń jarqyn bolashaqqa umtylysyn aıshyqtaı túsedi.
Búginde Astana — elimizdiń qoǵamdyq, saıası jáne iskerlik ordasy. Dál osy jerde halqymyzdyń bolashaǵyna qatysty mańyzdy sheshimder qabyldanady, ozyq ıdeıalar iske asyrylyp, bıik maqsattar oryndalady. Munda bilimpazdyq pen eńbekqorlyq qundylyqtary berik ornyǵyp, jurtymyzdyń yntymaǵy men kelisimi nyǵaıa beredi.
Astana Ortalyq Eýrazııanyń jaýhary, zamanaýı Qazaqstannyń kelbeti sanalady. Halyqaralyq qaýymdastyq bas qalamyzdy bitimgershilik bastamalardy júzege asyryp, jahandyq dıalog ornatý isinde erekshe ról atqaratyn beıbitshilik shahary retinde biledi.
Elordamyz árdaıym túbegeıli ózgerister men aýqymdy reformalardyń bastaýynda turady. Aldaǵy ýaqytta da Astanamyz Ádiletti, Taza jáne Qýatty Qazaqstandy qurý jolyndaǵy jalpyulttyq jańǵyrý jumystaryna uıytqy bola beredi dep senemin.
Súıikti qalamyz órkendep, gúldene bersin!
Barshańyzǵa zor densaýlyq, baq-bereke tileımin!
