Ertis boıyndaǵy «Samal» saıabaǵynan bastalǵan kemeler sherýi aǵysqa qarsy júzip, kemejaıǵa deıin jetti. Munda jınalǵan qalalyqtar men qala qonaqtary qaıyqtardyń sý betinde oıqastaǵanyn kórip, tań-tamasha boldy. Kók týdy jelbiretken kemelerdiń birine aqsaqaldar men aq jaýlyqty keıýanalar minse, endi birine kúı kúmbirletken dombyrashylar jaıǵasqan. Sóıtip, irkes-tirkes Ertispen júzip ótti. Adyr belderdiń ortasynan qonys tepken О́skemendi qaq jaryp, Ertis aqsa, oǵan Batys Altaıdan arqyrap-sarqyrap bastaý alǵan Úlbi qosylady. Osyndaı erekshe shaharda sý jolyn damytsa, suranys joq emes. Tipti, ózge de qalalardan sý tramvaıyn qyzyqtap keletin meımandar az emes.
– Jaz shyqsa, bala-shaǵamyzben qaıyqqa minip, anaý GES-ke deıin qydyryp qaıtamyz. Sýly qalada turyp, mundaı serýenniń bary zańdy da. Áıtpese, jasandy ózennen ókirtip paıda taýyp otyrǵan qalalardy da bilemiz. Onyń qasynda bizdiki qolda bar baılyq, – deıdi О́skemen qalasynyń turǵyny Saqyp Básenova.
Búgingi erekshe sharaǵa oblys basshysy Nurymbet Saqtaǵanov ta kelip qatysty. Ol kúı kúmbirin áýeletip júrgen jas dombyrashylarǵa júrekjardy tilegin aıtty.
– Búgin biz halqymyzdyń rýhanı baılyǵyn jáne tarıhy men dástúriniń ajyramas baılanysyn bildiretin erekshe mereke – Ulttyq Dombyra kúnin atap ótip otyrmyz. Dombyra – jaı ǵana mýzykalyq aspap emes, bul – urpaqtar sabaqtastyǵynyń sımvoly, ótken men búgindi, bolashaqty jalǵaıtyn mura. Osy asyl mura jastarymyzdy shabyttandyryp, mádenı bolmysymyzdy nyǵaıtyp, bizdi uly muramyzdy maqtanyshpen bolashaqqa jetkizýge úndeı bersin! – dedi oblys ákimi Nurymbet Saqtaǵanov.
Bul aýqymdy shara sońǵy 40 jylda óńirdegi keme qatynasy salasynda alǵash ret ótkizilip otyr. Aımaq basshysy aıtqandaı, sý resýrstaryna baı Shyǵys Qazaqstanda keme qatynasy qaıta jandanyp, serpindi damyp keledi. Búgingi aýqymdy shara sonyń dáleli.
– Keler jyly biz bul paradqa ózge oblystar men shekara mańy memleketterinen de qatysýshylardy shaqyramyz. О́ıtkeni, Ertis ózeni men onyń akvatorııasy buǵan tolyq múmkindik beredi, – dedi oblys ákimi Nurymbet Saqtaǵanov.
Paradqa «Qazaqstan sý joldary» kompanııasynyń «Bolat Karentaev», «Altaı», «KS-111» sekildi teplohodtary, «BELALEKS» jáne ShQO TJD katerleri qatysty. Sonymen qatar, gıdrosıkl ıeleri de belsene atsalysty.
О́skemen
