Foto: Májilistiń Baspasóz qyzmeti
Aıta keteıik, joba aıasynda 11 400 oqýshyǵa arnalǵan 14 mektep salynady. Onyń ishinde 2 mektep byltyr paıdalanýǵa berilse, jańa oqý jylyna deıin taǵy 3200 orynǵa arnalǵan 4 mektep qoldanysqa beriledi. Sonyń biri – Aqtóbe qalasyndaǵy Saıajaı-1 turǵyn alabynda salynyp jatqan 300 oryndyq bilim ordasy. Bul «AMANAT» partııasynyń saılaýaldy baǵdarlamasyn júzege asyrý jónindegi Jol kartasyna engizilgen.
«Oqýshy oryndarynyń tapshylyǵyn joıý – partııa baǵdarlamasyndaǵy basym baǵyttardyń biri. Bul mektep №50 mekteptegi oryn tapshylyǵy máselesin sheshýge kómektesedi. Sonymen qatar zamanaýı bilim berý mekemesi sońǵy tehnologııalarmen jabdyqtalyp, balalardyń jan-jaqty damýyna tolyq múmkindik beredi. Jalpy «Jaıly mektep» jobasy arqyly jyl sońyna deıin úsh aýysymmen oqytý máselesi túbegeıli sheshiledi», dedi Q.Álishev.
Aıta keteıik, mekteptiń qurylysy 2023 jyly bastalǵan. Jobanyń jalpy quny 3,53 mlrd teńge, ǵımarattyń aýdany 6 myń sharshy metrden asady.
Sonymen qatar nysandy aralaý barysynda depýtat mekteptiń hımııa páni kabınetteriniń jabdyqtalýyna baılanysty eskertý jasaǵan.
«Balalar laborotorııalyq jumys jasaǵan kezde zııandy zattarmen ýlaný qaýpinen saqtaný úshin hımııa páni kabınetinde aýa sorǵysh qurylǵylary kóp bolýy kerek. Eger ol sanıtarlyq-epıdemıologııalyq baqylaý talaptarynda bolmasa, biz zańǵa ózgerister engizýge daıynbyz», dedi ol.
Sapar barysynda Qazybek Álishev Aqtóbe oblysyndaǵy «Jaısań» shekara beketiniń jumysymen de tanysty. Budan bólek, Mártók aýylynda salynyp jatqan órt sóndirý deposynyń qurylysyn aralady. Bul nysan da partııanyń Jol kartasyna sáıkes bıyl paıdalanýǵa berilýi tıis.
Sondaı-aq depýtat Shalqar aýdanyna qarasty Bozoı aýylynda jergilikti turǵyndarmen kezdesip, sport kesheni, mektep, jazǵy fýtbol alańy jáne jol qurylysy syndy mańyzdy máselelerdi talqylady. Kezdesýde suıytylǵan gaz tapshylyǵy men ony jetkizý máselesi de kóterildi.
