«Kóp adam bul jazýlardy jaı graffıtı dep qabyldaıdy. Al shyn máninde, olar jastardy Telegram arqyly esirtkige tartatyn arnalardyń siltemesi ekenin bile bermeıdi. Biz keıingi bir aıda oblys aýmaǵynan 500-den asa osyndaı jarnamany óshirdik. Onyń ishinde mektep mańynda ornalasqandary da boldy», deıdi jobanyń úılestirýshisi Ádilet Aıtqazy.
Uıymdastyrýshylardyń aıtýynsha, búginde «Saqtan» jobasy aıasynda jastarmen tikeleı jumys isteıtin 50-ge jýyq erikti men bilikti maman tartylǵan. Olar kún saıyn áleýmettik jelilerdi baqylap, jasyryn esirtki jarnamasyn anyqtap, jergilikti jastarmen túsindirý jumysyn júrgizip keledi.
«Biz kúnine keminde 10–15 kúmándi siltemeni anyqtaımyz. Kóp jaǵdaıda olar Telegram-arnalar arqyly taratylyp, jastardy qyzyqtyratyn ataýlarmen búrkemelenedi. Jarnamalar mektep qabyrǵasyna, aıaldamaǵa nemese jataqhana mańyna jazylady. Sol úshin áleýmettik jelini de, kósheni de qatar baqylaýǵa týra keledi», deıdi eriktiler tobynyń úılestirýshisi Araılym Bekova.
Sonymen qatar kámeletke tolmaǵandardyń túngi ýaqytta baqylaýsyz júrýiniń aldyn alý maqsatynda eriktiler quqyq qorǵaý organdarymen birge túngi reıdterge qatysýdy jolǵa qoıǵan. Bul sharalar da jobanyń mańyzdy baǵyty retinde jalǵasyp jatyr.
Joba aıasynda Qarasaı, Talǵar, Ile, Jambyl, Eńbekshiqazaq aýdandary men Qonaev qalasynda 7 semınar ótkizilip, 1 myńǵa jýyq jas pen ata-ana qamtyldy. Kezdesýlerde esirtki qylmysyna qarsy kúres júrgizip júrgen polıseıler, psıhıatr-narkologter, depýtattar, sport chempıondary men esirtkige táýeldilikten arylǵan azamattar qısyq jolǵa túsýdiń qıyndyǵyn mysalǵa keltirip, zııandy ádetterdiń aldyn alý joldaryn túsindirip, jastarmen ashyq pikir almasty.
Almaty oblystyq Jastar saıasaty máseleleri jónindegi basqarmasynyń qoldaýymen júzege asyrylyp jatqan bul jobanyń basty maqsaty – jastar arasynda nashaqorlyq, sýısıd, veıpıng jáne qumar oıyndar syndy zııandy ádetterdiń taralýyna qarsy turý jáne olardyń aldyn alý.
Almaty oblysy
