Ádilet mınıstrligi azamattardyń qarjylyq shyǵynyn jáne ýaqytyn únemdeý, qyzmetterdiń sapasy men qol jetimdiligin arttyrý maqsatynda birqatar qyzmetti sıfrlandyrǵan. Máselen, mınıstrliktiń resmı ókili Talǵat Ýálıdiń aıtýynsha, buryn notarıýstar atqarýshy jazbalardy qaǵaz túrinde berip kelse, qazirgi ýaqytta atqarýshylyq jazbalar elektrondyq formatta resimdeledi. Notarıýstyń elektrondyq sıfrlyq qoltańbasy qoıylǵan bul qujattardyń zańdy kúshi bar.
«Notarıattyq jazbalardy oryndaýdyń sıfrlyq jobasy ashyqtyqty, barlyq is-áreketti tirkeýdi jáne taraptardyń quqyqtaryn qorǵaýdy qamtamasyz etedi. Jeke kabınet qurylyp, sol arqyly boryshkerdiń habarlama jáne qarsylyq joldamasyn alý múmkindigi bar. Azamattar tarapynan negizdi qarsylyq bolǵan jaǵdaıda notarıýs atqarýshylyq jazbanyń kúshin joıýǵa mindetti», dedi T.Ýálı.
Mınıstrliktiń «Digital Justice» jobalar portfeli aıasynda qoldanysqa engizgen bul jobasyn azamattar oń baǵalap jatyr. Máselen, osy jyldyń 31 naýryzynan bastap qazirgi kezge deıin 32 myńnan asa atqarýshylyq jazbanyń kúshi joıylǵan.
Sondaı-aq Ádilet mınıstrliginiń resmı ókili avtorlar quqyqtarynyń ashyqtyǵy men qorǵalýyn qamtamasyz etý, avtorlyq jáne sabaqtas quqyqtardy ujymdyq basqarý maqsatynda sıfrlyq platforma engiziletinin málimdedi.
«Bul platforma júzege asqanda avtorlar jeke kabınetterine kirip, týyndylarynyń qaı jerde qanshalyqty oryndalyp jatqanyn, qandaı tólemaqy tıesili ekenin jáne jyl sońynda qansha qarajat alatynyn onlaın rejimde baqylaýǵa múmkindik alady», dedi spıker óz sózinde.
Osy jartyjyldyqta Ádilet mınıstrligine qarasty ádilet organdary zııatkerlik menshik quqyǵyn qorǵaý maqsatynda birneshe tekserý júrgizgen. Sonyń nátıjesinde 138 zań buzýshylyq anyqtalyp, ÁQBtK-niń 158-babymen 142 is qozǵalǵan. Zańsyz aınalymnan 78 711 kontrafaktilik ónim tárkilengen. Mınıstrlik aldaǵy ýaqytta osy baǵyttaǵy jumysyn jalǵastyra bermek.
Sondaı-aq mınıstrlik ókilderi otandyq kásipkerler 150-ge jýyq geografııalyq nusqamany tirkegenin málimdedi. Elimizdiń ár aımaǵy óziniń biregeı ónimderimen erekshelenedi. Máselen, Almaty oblysy Baqanas kúrishi, Talǵar almurty, Narynqol kartoby sııaqty ónimderdi maqtanysh tutady. Atyraý oblysy óziniń keptirilgen torta balyǵymen tanymal.
«Búginde Qazaqstanda «Saryarqa saýmaly», «Atyraý dombyrasy», «Qarǵaly tarysy», «Qaraǵandy balmuzdaǵy» jáne t.b ataýlarmen jańa geografııalyq nusqamalar tirkeldi. Geografııalyq nusqamalardyń odan ári Qazaqstannyń ulttyq brendin qalyptastyrýǵa jáne elimizge týrısterdi tartýǵa yqpaly zor», dedi Ádilet mınıstrliginiń resmı ókili.
Ádilet mınıstrliginiń Qoǵamdyq tártip salasyndaǵy zańnama departamentiniń dırektory Dýman Súleımenov áýe kemesin basqarýǵa kedergi jasaý, stalkıng jáne erkinen tys neke qıdyrý sekildi jaǵdaıattarǵa qatysty qylmystyq zańnamaǵa birqatar ózgeris engiziletinin habarlady. Bul qadamdar azamattar men kásipkerlerdiń quqyqtaryn qorǵaýdy kúsheıtýge, qylmystyq prosestegi úılesimdilikti nyǵaıtýǵa, sondaı-aq qylmystyq prosesti ońtaılandyrý men bıýrokratııany azaıtýǵa baǵyttalmaq.
Sonymen qatar Ádilet mınıstrligi alıment óndirý salasyna da turaqty baqylaý júrgizedi. Spıkerlerdiń málimetine qaraǵanda, qazirgi ýaqytta alıment óndirý boıynsha 319 myń is qaralyp jatyr. Boryshkerlerdiń 310 myńnan astamy – er-azamattar, al 8 myńnan astamy – áıelder. Mınıstrlik ókili alımenttik tólemder kóp jaǵdaıda jumys berýshilerdiń esep bólimderi arqyly aı saıyn óndiriletinin, bank shottaryna, múlkine tyıym salý jáne elden shyǵýǵa ýaqytsha shekteý qoıý sııaqty sharalar qoldanylatynyn tilge tıek etti. Mınıstrliktiń resmı ókili Talǵat Ýálıdiń aıtýynsha, ádilet organdary boryshkerlerdi jumysqa ornalastyrý jumysyn da júrgizedi. Máselen, 2025 jyldyń birinshi jartyjyldyǵynda ádilet organdary men ákimdikterdiń birlesken jumysynyń arqasynda 3 077 boryshker jumysqa ornalasqan.
