Agenttik túsindirmesine súıensek, bul talap otbasylyq múlikti qorǵaýǵa jáne nesıeni teris maqsatta rásimdeýge jol bermeýge baǵyttalǵan. Qaryzdy bir jubaı ekinshisiniń kelisiminsiz alyp, ony otbasy qajetine emes, jeke paıdasy úshin jumsaǵan jaǵdaıda, bul zań buzý bolyp esepteledi. Mundaıda ekinshi jubaı nesıeni moıyndaýdan bas tartyp, ony zańsyz dep tanýǵa quqyly.
«Eger siz jubaıyńyzdyń sizden jasyryn nesıe alǵanyn bilseńiz, birinshi kezekte bankten nemese mıkroqarjy uıymynan sol qaryz týraly tolyq aqparat suratýyńyz kerek. Bul úshin sizge notarıaldy senimhat qajet bolýy múmkin. Keıin nesıe zańsyz dep tanylýy úshin resmı jazbasha ótinish jazyp, qarjy uıymyna joldaý kerek. Eger bank nemese mıkroqarjy uıymy aryzyńyzdy qanaǵattandyrmasa, siz Agenttikke nemese bank ombýdsmenine shaǵymdana alasyz», dep túsindiredi ókiletti organ.
Aıta keteıik, búginde Agenttik tıisti zańnamaǵa ózgerister engizýdi kózdep otyr. Jańa jobaǵa sáıkes, eger tutynýshylyq nesıe somasy 1000 aılyq eseptik kórsetkishten (shamamen 3,9 mln teńge) assa, ony rásimdeý úshin jubaıynyń mindetti kelisimi qajet bolady. Tek eki jaǵdaıda ǵana bul talap qoıylmaıdy: eger jubaı qaryzǵa birge kiretin bolsa nemese nesıe burynnan bar qaryzdy óteý úshin sol bankten alynǵan bolsa.
Mundaı ózgerister azamattardyń qarjylyq qaýipsizdigin arttyryp, otbasylyq jaýapkershilikti kúsheıtýge baǵyttalǵan.
