Qala ákiminiń orynbasary Sársen Quranbek vaýcher júıesine deıin balalar úıirmelerge qaǵaz júzinde ǵana qatysyp kelgenin jetkizdi. Aıtalyq bes myńnan astam oqýshy tirkelse, sonyń ári ketse tórt myńy ǵana úıirmege baratyn. Vaýcherde júıe avtomatty rejımge kóship, balanyń úıirmege qatysqan qatyspaǵany ashyq kórinip turady.
Alǵashqy kezde qosymsha bilim berý úıirmeleri túrli basqarmalarǵa qaraıtyn. Sporttyq seksııalar sport basqarmasyna, shyǵarmashylyq mádenıet basqarmasyna degen sekildi. Keıin olardyń barlyǵy bilim berý basqarmasyna biriktirildi. Deı turǵanmen munda da biraz túıitkelder anyqtalyp otyr. Máselen úıirmeler bilim basqarmasyna biriktirilgenimen, ózgeris áli zańdy kúshine enbeı otyr. Qoǵamdyq keńes músheleri sol máseleni talqylap, onyń sheshý joldaryn qarastyrdy.
Qansha jerden júıe avtomatty bolǵanymen úıirmege qatyspaǵan oqýshylardy tizimge jalǵan tirkep qoıatyn jaǵdaılar arakidik kezdesip jatady. Bul bilim salasyndaǵy sybaılas jemqorlyqqa jol beretin qylmys bolyp tabylady. Sondyqtan jıynǵa qatysýshylar osy problemany joıyp, barynsha baqylaýdy kúsheıtý jóninde oılaryn ortaǵa saldy. Bul rette qala ákiminiń orynbasary S.Quranbek vaýcher júıesiniń artyqshylyǵy men tıimdiligin aıta kele, alda ýaqytta jobany jetildirý boıynsha jumystar jalǵasa beretinin jetkizdi. Sondaı-aq ol jıynda kóterilgen barlyq máselelerge qatysty naqty sharalar qabyldanyp, qosymsha bilim berý qyzmetin ashyq, taza etý ákimdik alǵa qoıǵan basty maqsat ekenin málimdedi.
Shymkent
