Foto: Aqorda
Memleket basshysyna ulttyq kompanııanyń atqarǵan jumysynyń nátıjesi tanystyryldy.
Prezıdentke búgingi tańda elimizdegi gazdandyrý deńgeıi 62,4 paıyzǵa jetkeni jóninde baıandaldy. Sońǵy úsh jylda 1,7 mıllıon otandasymyz tabıǵı gazdyń ıgiligin kóre bastady.
Qasym-Jomart Toqaevqa Jetisý oblysynyń 66 eldi mekenin gazben qamtamasyz etetin Taldyqorǵan – Úsharal gaz qubyrynyń jelilik bóliginiń qurylysy aıaqtalǵany týraly esep berildi. Budan bólek, Qashaǵan ken ornynda suıytylǵan munaı gazyn aýystyryp tıeý jáne fraksııalaý zaýytynyń qurylysy, Beıneý – Bozoı – Shymkent magıstraldyq gaz qubyrynyń ekinshi jelisin salý jumystary bastaldy. Túrik ınvestory – ESTA kompanııasynyń qatysýymen quny 1,35 mıllıard dollar bolatyn karbamıd zaýytynyń jobasy qolǵa alyndy.
Sanjar Jarkeshovtyń aıtýynsha, reseılik kógildir otyndy Qazaqstan arqyly О́zbekstanǵa tasymaldaý kóleminiń artýy – saladaǵy mańyzdy jetistiktiń biri. Sondaı-aq ulttyq kompanııa basshysy Orta Azııa – Ortalyq magıstraldy gaz qubyrynda júrgizilip jatqan kúrdeli jóndeý jumystary jóninde aıtty. Atalǵan joba óńirlik energetıka salasyndaǵy mańyzdy býyn retinde elimizdiń rólin arttyra túsedi.
Memleket basshysynyń gazdyń resýrstyq bazasyn damytýǵa qatysty tapsyrmasyn oryndaý aıasynda birqatar strategııalyq kelisimge qol qoıyldy. Olardyń qatarynda «Aqqudyq» jáne «Severnyı-2» ýchaskelerindegi jer qoınaýyn paıdalanýǵa arnalǵan kelisimsharttar, sondaı-aq CNPC kompanııasymen birlese «Severnyı-1» ýchaskesinde barlaý jumystaryn júrgizý týraly kelisim bar.
Budan bólek, Memleket basshysyna gaz salasynda sıfrlyq sheshimder engizý, sonyń ishinde NVIDIA jańa grafıkalyq chıpterimen jumys isteıtin sýperkompıýterdi qoldaný jospary jaıynda baıandaldy.
Kezdesý sońynda Qasym-Jomart Toqaev aldaǵy jylytý maýsymyna daıyndyqqa, elimizdiń gaz salasyndaǵy áleýetin josparly túrde nyǵaıtýǵa qatysty birqatar naqty tapsyrma berdi.
