Buqaralyq sharaǵa elimizdiń barlyq aımaqtarynan júgirýdi aınymas ádetke aınaldyrǵan 300-den astam sportshy qatysty. Sonymen qatar Bolgarııa, Reseı, Belarýs, Ýkraına, О́zbekstan, Qyrǵyzstan memleketterinen kelgen jelaıaqtar da jarys jolyna shyqty.
Úsh kúndik básekede 18 ben 85 jas aralyǵyndaǵy jeńil atletter baıqaý baǵdarlamasyna sáıkes óner kórsetti. 18 ben 34 jas aralyǵynda áýesqoılar jarysy, WMA halyqaralyq standarttaryna sáıkes Masters chempıonaty (35+), túrli qashyqtyqtarǵa júgirý, estafetalar, sekirýler, laqtyrýlar syndy sport túrleri boıynsha jarys kórigi qyzdy.
«Týrnırdi uıymdastyrýdaǵy maqsatymyz – elimizdiń basty qundylyǵy qarttarǵa qurmet, qalyń buqaranyń sportpen aınalysýyna muryndyq bolý», deıdi «Qazaqstandyq Masters Athletic federasııasy» respýblıkalyq qoǵamdyq birlestiginiń basshysy Turar Ábýtalıev.
Jarysqa álem, Azııa chempıony Sergeı Polıkarpov, halyqaralyq dárejedegi sport sheberi, 70+ marafon marshrýtynyń qatysýshysy Marat Baltabaev, Kúlásh Tólebaeva, Rımma Voevodına, Valerıı Jumadilov, Lıýbov Asanova syndy tanymal sportshylar qatysty.
Týrnırdiń ashylý saltanatyna Almaty oblysy ishki saıasat basqarmasynyń basshysy Erik Ábıtov arnaıy qatysyp, qatysýshylardy quttyqtady.
«Halyqaralyq ashyq týrnır – sporttyq doda ǵana emes, elimizdegi birlik pen kelisimniń, jastar men aǵa býynnyń sabaqtastyǵynyń, salamatty ómir salty men belsendi uzaq ǵumyrdyń naqty kórinisi, elimizdiń ashyqtyǵynyń, dostyqqa, beıbitshilikke, sport arqyly birigýge degen umtylysynyń aıqyn dáleli. Qazaqstan halqy Assambleıasynyń 30 jyldyǵyna oraı uıymdastyrylyp otyrǵan shara – etnosaralyq tatýlyqty, qoǵamdyq kelisimdi nyǵaıtýdyń úlgisi. Almaty oblysy – árdaıym qoǵamdyq bastamalarǵa, azamattyq qoǵam ınstıtýttaryna, eriktiler qozǵalysyna qoldaý kórsetip kele jatqan óńir. Biz mundaı sporttyq-mádenı is-sharalardy jalǵastyryp, jas býynǵa úlgi etýge árqashan daıynbyz», dedi Erik Áziljanuly.
Sonymen qatar Qazaqstan halqy Assambleıasy tóraǵasynyń orynbasary Marat Ázilhanovtyń quttyqtaýyn jetkizdi. Onda: «Qazaqstan halqy Assambleıasynyń qoldaýymen jeńil atletıka, «Master Athletics Kazakhstan» federasııalary birlesip ótkizip otyrǵan sporttyq shara – etnostar arasyndaǵy dostyqtyń, birliktiń, ózara qurmettiń jarqyn kórinisi. Assambleıa bul týrnırdiń qoǵamdyq seriktesi bola otyryp, sport arqyly eldik qundylyqtardy ilgeriletýdi maqsat etedi. «Alatau 2025» týrnıri – sporttyń ózara senim men qoldaýǵa negiz bola alatynynyń aıqyn dáleli», dep jazylǵan.
«Ashyq chempıonattyń baǵdarlamasy kásipqoı jarysqa uqsas. Týrnırdiń artyqshylyǵy – básekege kez kelgen azamat qatysyp, Qazaqstan chempıony atana alady. Bul jeńil atletıka erejesine saı jáne resmı ataq bolyp esepteledi», deıdi tanymal sportshy Valerıı Jumadilov.
Ashyq chempıonattyń eń jasy úlken qatysýshysy 84 jastaǵy Ulan Hasenov aqsaqal. «Sport – adamnyń densaýlyǵyn jaqsartyp, ómirin uzartady. Sol sebepti bir mezgil júgirip, shynyǵyp turýdyń paıdasy zor. Basketboldan arnaıy komanda jasaqtadym. Oıynshylardyń eń jasy 60-ta bolsa, eń úlkeni ózim. Osyǵan deıin 10 shaqyrymdyq 10 marafonǵa qatystym», deıdi ardager-sportshy.
Alǵash ret 12 adamnan bastaý alǵan «Alatau 2025» chempıonatyna qatysýshylar sany bıyl 300-den asqan. Elimizde tórtinshi márte ótip otyrǵanymen, salamatty ómir saltyn nasıhattaıtyn bul jarys túri álem elderinde jarty ǵasyrdan beri turaqty túrde uıymdastyrylyp keledi eken.
Almaty oblysy
