Nemeresi kelip ketipti. Amerıkanyń aıtýly ýnıversıtetin bitirgen, sheteldiń tórt tilin biletin zerek. Anasynyń aıtýyna qaraǵanda, dúnıeniń bilimin boıyna qotaryp alǵan bilgir. Sol bala shańyraq kótermek eken. Áýeli bar áýleti qýanǵan. Keıin renish.
– Balanyń ýaqtyly shańyraq kótergeni durys emes pe, – deımiz biz, – ilkidegi qazaq «on úshte otaý ıesi» degen, nemereńiz de otaý quratyn jasqa jetti emes pe?
– Árıne, – deıdi Bákir aqsaqal sál kúmiljip, – otaý qurǵanyna qarsy emespiz ǵoı, tek reti kelmeı turǵany.
Birden taratyp aıtpaǵanymen, jata-jastana máseleniń mánisi belgili boldy. Syrǵa salǵany túbin qýyp kelgende osy aýyldyń tóli eken ári bóten de emes, óz aǵaıyny. Tórt atadan qosylady. Ol bala da shetelden oqý bitirgen. Sol jaqta turyp tanyssa kerek. Túp tórkini bir bolǵanymen, keıingi jastar bir-biriniń túptamyryn bile bermeıdi ǵoı. Taǵdyr soqpaǵy tanystyrǵan, tabystyrǵan.
О́tken joly kelgende Bákir aqsaqal burynǵynyń jol-joralǵysyn oqymysty balanyń zerdesine quısa kerek. Áýeli áke men bala, odan soń nemere men shóbere, keıin shópshek pen nemene, jetinshi urpaq týajat. Balada áke men ananyń qanyndaǵy qasıet mólshermen alǵanda elý paıyzdy qurasa, nemerede 25, shóberede 12-iniń tóńireginde. Al jetinshi urpaq týajatqa jetken kezde qandaǵy qasıetten juqana da qalmaıdy. Týajat deıtini de sondyqtan. Týdy bitti, jat adam. Tuqymyn taza ustaǵan arda qazaqtan qalǵan kıeli ósıet osy.
– Qazir ǵylymnyń jetistigi, oılap tapqan jańalyǵy dep júr ǵoı, – deıdi Bákir aqsaqal, – bizdiń atalarymyz ol tylsym dúnıeniń tuńǵıyǵyn baıaǵyda-aq ajyratyp ketti emes pe? Jeti urpaqqa deıin otaspaıtyndyǵy sondyqtan. Osy kúni kemtar bala kóbeıdi. Keıde oılap qoıamyn, jeti atasyn bilmeýdiń kesiri emes pe eken dep. Álgi nemerege bastan jaqty aıyrǵandaı etip aıtyp berdim. Túsinse jaqsy, túsinbese el-jurttan uıattaǵy.
Týajat. Talaı estigenmin. Biraq baıybyna baryp, mán bermeppin. О́zimizden taraıtyn urpaqtyń da esine salyp qoıý kerek eken. Kúnderdiń bir kúninde Bákir aqsaqal tárizdi berekesi ketpesin.
