Astanada ótken Kazakhstan Open 2025 halyqaralyq týrnıri bıyl erekshe oqıǵamen este qaldy. Qazaqstan karate federasııasy uıymdastyrǵan dodada alty elden kelgen 560-tan asa sportshy ózara myqtyny anyqtady. Kata, kýmıte jáne komandalyq kýmıte boıynsha ótken 58 sanattaǵy tartys bıyl aýyl jastary úshin tarıhı kezeńge aınaldy. Sebebi alǵash ret halyqaralyq arenada qazaqtyń aýyl balalary óner kórsetken.
Bul – Halyk qaıyrymdylyq qory júzege asyryp jatqan «AUYL SPORT» jobasynyń nátıjesi. Iri kásipker, sport janashary Tımýr Qulybaevtyń aýyldaǵy talantty jastarǵa jol ashý jónindegi strategııalyq bastamasymen «Halyk» qory buqaralyq sportty qoldaýǵa júıeli túrde qarjy bólip keledi.
Joba aıasynda iriktelgen 6 aýyl balasy el namysyn qorǵap, eki birdeı júldemen oraldy. Mańǵystaý oblysy Qyzylsaı aýylynyń 14 jastaǵy sportshysy Matjan Mádenıet 52 keli salmaqta kúmis medal jeńip alsa, Basqudyq aýylynan Anıshenko Zahar 60 keli salmaqta qola júldege ıe boldy. Bul – búkil aýylǵa, ustaz ben ata-anaǵa, jas jetkinshekke shabyt beretin tarıhı sát. Sportshylar tatamıge tek medal úshin emes, aýyldyń namysyn arqalap shyqty.
«Bul meniń ǵana emes, meni baptaǵan jattyqtyrýshymnyń, demeý bolǵan ata-anam men aýyldastarymnyń jeńisi. Alǵash ret shetelden kelgen qarsylastarmen tatamıge shyqtym. Qobaljydym, biraq aýyldyń úmitin aqtaý úshin barymdy saldym. Endi Álem chempıony bolamyn degen armanyma senemin. “AUYL SPORT” jobasyna jáne Halyk qoryna sheksiz alǵys aıtamyn», deıdi jas sportshy Matjan Mádenıet.
Aıta keteıik, týrnır qorytyndysy boıynsha, jastar quramasy jasaqtalyp, 2025 jylǵy qyrkúıekte Qytaıdyń Hanchjoý qalasynda ótetin Azııa chempıonatyna joldama alady.
«Halyk» qory týrnırdi joǵary deńgeıde uıymdastyrǵan Qazaqstan karate federasııasyna alǵys bildirip, jas sportshylardyń baǵyn ashýǵa yqpal etken kásibılik pen adal eńbekti erekshe atap ótti.
«Bul týrnır aýyl balalarynyń armanyna jol ashqan úlken alań. Bizdiń maqsat – árbir aýyl balasyna óz darynyn tanytyp, úlken sportqa qadam basýǵa múmkindik berý. Kazakhstan Open 2025 – osy joldaǵy mańyzdy beles. Bul múmkindik búgingi jeńisten de mańyzdy», dedi Halyk qaıyrymdylyq qorynyń atqarýshy dırektory Ǵalymbek Jaqsylyquly.
Aıta keteıik, «AUYL SPORT» – «Halyk» qaıyrymdylyq qory qolǵa alǵan mańyzdy áleýmettik joba. Baǵdarlama 2024 jyldan bastap aýyldyq jerlerde buqaralyq sportty damytý, talantty balalardy qoldaý jáne kásibı sportqa baǵyttaýǵa jumys isteıdi. Búginde bul bastama aıasynda elimizdiń túkpir-túkpirinde 10 myńnan astam bala túrli sport túrimen júıeli túrde aınalysyp júr.
AUYL SPORT baǵdarlamasynyń tıimdiligin dáleldeıtin taǵy bir aıǵaq – Serbııada ótken GYMNASIADE halyqaralyq saıysynda 12 aýyl balasynyń 6 medal jeńip alýy. Endi sol tájirıbe Kazakhstan Open aıasynda jalǵasyp, aýyl sportshylary halyqaralyq arenaǵa senimdi qadam basyp otyr.
Al qaıyrymdylyq qory elimizdiń túkpir-túkpirindegi muqtaj jandarǵa qoldaý kórsetip, áleýmettik jaýapkershilikti serik etken iri uıym. Qor aýyl sportyna ǵana 500 mıllıon teńgege jýyq qarjy bólip qoımaı, jalpy sany 120-dan astam áleýmettik jobany júzege asyryp, 85 mıllıard teńge kóleminde qarajat jumsaǵan.
