Foto: primeminister.kz
Iske qosý rásimine Premer-mınıstriniń orynbasary Ermek Kósherbaev, Qostanaı oblysynyń ákimi Qumar Aqsaqalov, «Kedentransservıs» AQ Bas dırektory Elnar Jumataev jáne Allur kompanııalary dırektorlar keńesiniń tóraǵasy Andreı Lavrentev qatysty.
Joba «Kedentransservıs» AQ qatysýymen, «О́nerkásipti damytý qory» AQ qoldaýymen júzege asyrylyp jatyr. Logıstıkalyq keshenniń aýmaǵy 133,6 gektardy quraıdy, ınvestısııanyń jalpy kólemi – 64 mlrd teńge. «Tobyl» KLK jobalyq qýaty – jylyna 400 myń jıyrma fýttyq konteınerge (JFE) deıin nemese 11 mln tonnadan astam júk.
Keshen logısterdi, operatorlardy, IT mamandardy, qyzmet kórsetýshi personal men jas mamandardy jumysqa ornalastyrý maqsatynda 500 jańa jumys ornyn quratyn bolady.
Ulttyq masshtabtaǵy Hab jáne bolashaq ınfraqurylymy
Premer-mınıstrdiń orynbasary Ermek Kósherbaev iske qosý rásiminde sóılegen sózinde jobanyń mańyzy týraly aıtyp ótti.
«Biz jaı ǵana logıstıkalyq hab salyp jatqan joqpyz, eldiń jańa ekonomıkalyq geografııasynyń berik negizin qalap jatyrmyz. «Tobyl» logıstıka, sıfrlandyrý, bilim jáne ındýstrııa toǵysqan zııatkerlik alańǵa aınalady. Munda jastar úshin jańa quzyret, jańa jumys oryndary qurylmaq. Bul – aımaqtyq emes, ulttyq joba, búkil eldiń órkendeýiniń katalızatory. Keshen Qazaqstannyń jahandyq jetkizý tizbegindegi pozısııasyn nyǵaıtyp, bıznes, ınvestorlar úshin jáne osynda, óz otanynda ósip, damyǵysy keletin adamdar úshin jańa kókjıekter ashady», dedi Premer-mınıstrdiń orynbasary.
2025 jyldyń birinshi jartyjyldyǵynda Qazaqstan arqyly tranzıttik tasymaldaý 16,8 mln tonnany qurady, bul ótken jyldyń sáıkes kezeńimen salystyrǵanda 4%-ǵa artyq. «Tobyl» KLK iske qosylýy aldaǵy jyldary osy kórsetkishterge qosymsha serpin beredi dep kútilip otyr.
Aımaqtyń ındýstrıaldy klasteri úshin negiz
«Jańa keshen kásiporyndar úshin logıstıkalyq shyǵyndardy tómendetýge, eksportqa baǵdarlanǵan óndiristerdi damytýǵa jáne óńdeý sektoryna jańa ınvestısııalar tartýǵa jáne jańa ónerkásiptik kásiporyndardyń paıda bolýyna jaǵdaı jasaıdy. Biz «Tobyl» kólik-logıstıkalyq kesheni bıznes úshin tartymdylyq núktesine aınalatynyna jáne óńirdiń odan ári ónerkásiptik damýyna serpin beretinine senimdimiz», dep atap ótti «Tobyl» kólik-logıstıkalyq kesheniniń dırektory Aıdyn Álimov.
Keshen Qytaı, Ortalyq Azııa, Túrkııa, Iran, Aýǵanstan jáne Eýropany baılanystyratyn halyqaralyq kólik dálizderine biriktiriledi. «Soltústik Qazaqstan – Ońtústik Oral» baǵyty boıynsha da, QHR baǵytynda da júk aınalymynyń artýy kútilip otyr.
Keshen aýmaǵynda «Bári bir jerde» qaǵıdaty boıynsha termınaldar, qoımalar, kedendik rásimdeý, IT jáne servıstik aımaqtar ornalasatyn bolady. Naqty ýaqytta júkterdi baqylaýdyń sandyq júıesi qamtamasyz etilgen. Qurylysty aıaqtaý 2027 jylǵa josparlanǵan.
Jobany júzege asyrýdyń ózektiligi
Qostanaı oblysy elimizdiń basty ındýstrııalyq ortalyqtarynyń biri retindegi mártebesin bekitip jatyr. Tek 2025 jyldyń ózinde qýattylyǵy jylyna 70 myń avtokólikti quraıtyn KIA zaýytyn, jalpy qýattylyǵy 220 myń birlikten asatyn avtokomponentter men jıyntyqtaýyshtar óndiretin kásiporyndardy iske qosý josparlanǵan. Al damyǵan logıstıkasyz mundaı klaster múmkin emes. «Tobyl» kólik-logıstıkalyq kesheni aımaqta óndiriletin ónimderdiń turaqty eksportynyń júıeli ınfraqurylymdyq tiregi bolmaq jáne eýrazııalyq keńistiktegi yntymaqtastyqtyń jańa múmkindikterin ashady.
