«AMANAT» partııasy, Týrızm jáne sport mınıstrligi, Almaty qalasy men Almaty oblysy ákimdikteri jáne «KazAlpineClub» qaýymdastyǵy birlese júzege asyrǵan «Alataý amanaty» jobasynyń naqty keskini paıda bola bastady. Jobanyń negizgi jelisi – uzyndyǵy 1200 shaqyrymnan asatyn ulttyq týrıstik soqpaq. Ol Sharyn shatqalynan Tańbaly petroglıfterine deıin sozylyp, Almaty óńirindegi eń mańyzdy tabıǵı, tarıhı jáne mádenı oryndardy biriktiredi. Pılottyq kezeń aıasynda eki top birneshe negizgi baǵytty synaqtan ótkizdi. Qatysýshylar abattandyrylǵan ekosoqpaqtarmen qatar, kúrdeli taýly trekkıngpen de júrip ótti.
Jýrnalıster, blogerler jáne qoǵam belsendileri kirgen alǵashqy top abattandyrylǵan týrıstik soqpaqtarmen jeńildetilgen baǵytty júrip ótti. Olar saparyn Almaty mańyndaǵy eń qoljetimdi tabıǵı oryndardyń biri – kópshilikke sarqyramasymen tanymal Aıýsaı shatqalynan bastady. Keıin baǵyt heıkıng áýesqoılary arasynda tanymal Úlken jáne Kishi Almaty ózenderiniń aralyǵyndaǵy Kókjaılaý ústirti arqyly jalǵasty.
Qatysýshylar alǵashqy kúni 2200 metr bıiktikte ornalasqan Shymbulaq taý kýrortyndaǵy Shymbulak Resort Hotel qonaqúıinde túnedi. Ekinshi kúni qatysýshylar Býtakov shatqalyna baǵyt aldy. Bul – ormandy, bulaqty jáne ásem kórinisteri bar tynysh meken. Top Orman asýyn kesip ótip, Besqaınar aýyly mańyndaǵy glempıng aımaǵyna jetti, al úshinshi kúni óńirdegi eń tanymal taý týrıstik keshenderiniń biri – Oi-Qaragai kýrortynda márege jetti.
«Bul baǵyt – taý arasymen júrip ótetin jaı ǵana kórikti jer emes. Ol 1980-jyldary jyl saıyn 200 myńǵa jýyq adam júrip ótetin keńestik týrıstik soqpaqtarmen ishinara sáıkes keledi. Búginde biz bul joldy jańa deńgeıde – sapaly ınfraqurylymmen jáne ekologııalyq jaýapkershilikpen qaıta jańǵyrta alamyz», – dedi jýrnalıst Oleg Belov.
Kursiv basylymynyń bas redaktory Tatıana Nıkolaeva qazaqstandyq soqpaqtar shytyrman týrızmdi jaqsy kóretin kez kelgen deńgeıdegi týrısti qabyldaýǵa daıyn ekenin atap ótti. Onyń aıtýynsha, bul baǵyt eldiń myqty brendine aınalýy múmkin.
Osy ýaqytta ekinshi kúrdeli baǵytpen «KazAlpineClub» qaýymdastyǵynyń tájirıbeli nusqaýshylary, bilikti gıdteri men eriktileri júrip ótti. Olar da Aıýsaı shatqalynan bastap, 2511 metr bıiktikte ornalasqan Úlken Almaty muzdy kóline jetti. Keıin Karnıznyı shyńyna (shamamen 3300 metr) kóterilip, Almaty-Alagır asýyn kesip ótti. Top sonymen qatar tájirıbeli trekkerler arasynda tanymal, alaıda jetýi qıyn Terra taýly jaılaýyna jetti. Joryqtyń sońǵy núktesi – Almatynyń ońtústiginde ornalasqan, ystyq bulaqtary men demalys aımaqtarymen tanymal Alma-Arasan shatqaly boldy. Jańbyr men burshaq jaýyp, jel turǵan qolaısyz aýa raıyna qaramastan, top baǵytyn sátti aıaqtap, jol boıynda tastyń kómegimen nusqaǵyshtardy ornatyp, sıfrlyq kartalardy naqtylaý jáne navıgasııany jaqsartý boıynsha usynystar berdi.
«Karnıznyı shyńyna kóterilý – naǵyz synaq boldy. Kartalardaǵy baǵyt pen naqty joldyń arasynda aıyrmashylyq bar. Sondyqtan týrıster adaspaýy úshin baǵyttaǵysh tas nusqaǵyshtardy jol boıynda ózimiz qoıdyq. Bul jobanyń shynaıy tájirıbe arqyly jasalyp jatqanyn kórsetedi», – dedi top jetekshisi, ınstrýktor Konstantın Sapronov.
Búginde joba aıasynda arnaıy jabdyqtalǵan kempıng aımaqtary, glempıngter jáne týrısterge qajet ınfraqurylym jasaqtalǵan. Jaıaý júrginshilerge taýda qaýipsiz ári jaıly túneıtin oryndar usynylyp otyr. Qatysýshylar Aıýsaı vızıt-ortalyǵy men Almaty qalasynyń Týrızm basqarmasynyń kórsetken qoldaýyn erekshe atap ótti.
Model jáne bloger Olga Tıtova jobanyń aýqymy keńeıip, ekotýrızm salasyndaǵy úzdik halyqaralyq tájirıbemen tolyqtyrylǵan jaǵdaıda, bul bastama taýly marshrýttar boıynsha halyqaralyq standartqa aınalýy múmkin ekenin jetkizdi.
«Alataý amanaty» – bul tek týrıstik soqpaqtar jelisi ǵana emes. Bul – ekologııalyq sanany qalyptastyrý, jastardy belsendi tartý, jergilikti qaýymdastyqtardyń damýyna jol ashý jáne Qazaqstanda shytyrman taýly týrızmniń jańa ekojúıesin qurýǵa negizdelgen joba.
Almaty oblysy.
