Foto: primeminister.kz
«ADCB» Islam Banki – Qazaqstan men TMD elderinde ashylǵan alǵashqy ıslam banki. 2010 jyly Qazaqstan Respýblıkasy men Birikken Arab Ámirlikteri arasyndaǵy úkimetaralyq kelisimge sáıkes qurylǵan. 15 jyl ishinde bank elimizdegi jobalardy $3 mlrd-tan astam somaǵa qarjylandyrǵan. Bulardyń eń irisi – Atyraý oblysyndaǵy jylyna 1,25 mln tonna polıetılen óndiretin zaýyt qurylysy (Silleno jobasy), AMО́Z jáne PMHZ-da sýtegi men azot óndiretin qondyrǵylar, qurylys salasyndaǵy temir jol ınfraqurylymyn jańǵyrtý jobalary jáne taǵy basqalar.
«Damý» qorymen jumys sheńberinde bank ekonomıkanyń basym sektoryndaǵy kásipkerlerdi qoldaýǵa 25 mlrd teńge bóldi. Qordyń basqarma tóraǵasy Farhat Sársekovtiń aıtýynsha, bıznestiń ıslamdyq qarjylandyrý quralyna degen qyzyǵýshylyǵy joǵary.
Kezdesý barysynda qatysýshylar yntymaqtastyqtyń aldaǵy perspektıvasyn, onyń ishinde ıslam bankınginiń Qazaqstannyń salyq zańnamasymen ózara is-qımyl máselesin talqylady. Bank ókilderi otandyq jobalardy qarjylandyrý kólemin ulǵaıtý jospary týraly habarlady.
Serik Jumanǵarın agroónerkásiptik keshendi, ásirese mal sharýashylyǵyna ınvestısııa salýdy eń perspektıvalyq jobanyń biri retinde qarastyrýdy usyndy. Qazaqstan Taıaý Shyǵys elderiniń premıým sapaly ónimge degen joǵary suranysyna saı et eksportyn turaqty túrde arttyryp keledi.
