Aqtaý qalasynyń ákimdigi, halyqaralyq TÚRKSOI uıymy jáne Qazaqstan Jazýshylar odaǵy birlesip uıymdastyrǵan halyqaralyq ádebı yntymaqtastyqty damytý maqsatyndaǵy festıvalǵa Qazaqstan, Qyrǵyzstan, О́zbekstan, Ázerbaıjan, Túrkııa, Túrikmenstan memleketterinen 20-40 jas aralyǵyndaǵy qalamgerler qatysty. «Proza», «Poezııa», «Drama» janrlary boıynsha atalǵan elderden
59 talapker qatysyp, qazylar 12 júırikti anyqtady.
Á.Kekilbaıuly atyndaǵy oblystyq tarıhı-ólketaný mýzeıine saıahattan soń festıval Q.Sydıyqov atyndaǵy oblystyq ámbebap kitaphanada ádebı forýmmen jalǵasty. Forýmda aqyn, memlekettik syılyqtyń ıegeri Svetqalı Nurjan «Kórkem ádebıet jáne Túrki álemi», aqyn Sherhan Talap «Túrki elderi ádebıetiniń baılanysyn nyǵaıtý jáne jastar ádebıetin qoldaý», jazýshy Yrysbek Dábeı «Qazirgi túrki ádebıetindegi aýdarma máseleleri», aqyn Asylan Qýanyshuly «Zamanaýı túrki halyqtary poezııasy jáne Szıan Jýńnyń «Bóri Totemi» kitaby», aqyn Baqtybaı Jaılaý «Ábish Kekilbaıulynyń túrki dúnıesine qyzmeti» taqyrybynda baıandama jasady. Ár janr boıynsha úzdik qalamgerler marapattaldy. Drama janrynda Murat Qolǵanat, Poezııa janrynda Sherhan Talapuly, Proza janrynda Nurbek Nurjanuly
1 oryndy ıelendi.
Ádebı forým aqyndar aıtysyna ulasty. «Mańǵystaý – túrki mádenıetiniń tóri» atty respýblıkalyq komandalyq aıtystyń aqtyq saıysynda Aıtbaı Jumaǵulov jetekshilik etken Qaraǵandy jáne Bekarys Shoıbekov bastaǵan Túrkistan oblysynyń komandalary baq synady. Sóz sheberleri súre men túre aıtysta qoǵamdaǵy ózekti máselelerdi ótkir synasa, ótirik aıtys pen qaıym aıtysta qaǵytpa qaljyńmen kórermenge kóterińki kóńil kúı syılady. Jyrshylar qazaqtyń qaharmandyq-tarıhı jyrlaryn qobyzdyń qońyr únimen terbep, dombyranyń kúmbirimen árledi. Kúıshiler kúı tartysqa túsip, dástúrli án saıysy da ǵajapqa qaldyrdy.
– Ár komanda tek sýyrypsalma ónerimen ǵana emes, óz ólkesiniń sazyn, maqamyn, bolmysyn ala keldi. Qos óńirdiń ónerpazdaryn bir-birinen ústem deý qıyn. Bastysy – halyqtyń kókeıindegi másele aıtyldy, ulttyq sana jańǵyrdy, – dedi qazylar alqasynyń tóraǵasy Nurtóre Júsip.
Eki jylǵa sozylǵan respýblıkalyq komandalyq aıtysta Qaraǵandy men Túrkistan komandalary teń túsip, 1 oryndy ózara bólisti. 2 oryn Astana qalasy men Aqtóbe oblysyna buıyrsa, 3 oryndy Qyzylorda men Soltústik Qazaqstan oblystarynyń aqyndary qanjyǵasyna baılady.
