Foto: gov.kz
QOSYMSHA.KZ - memleket esebinen úıirmelerge, sport seksııalaryna jáne shyǵarmashylyq stýdııalarǵa tegin qatysýǵa múmkindik beretin burynǵy júıeniniń jańarǵan nusqasy.
2021 jyldan beri Qazaqstanda qosymsha bilim berýge arnalǵan vaýcherlik qarjylandyrý júıesi iske qosylǵan. Júıe arqyly memleket ár balanyń bir úıirmege qatysýyna qarjy bóledi. Al ata-ana balasynyń qyzyǵýshylyǵy men bos ýaqytyna saı baǵytty ózi tańdaıdy.
Bıyl elordalyq 25 000-nan astam bala osy baǵdarlama arqyly tegin qosymsha bilim alyp júr. El boıynsha bul kórsetkish 500 000-nan astam balany qamtıdy. Dese de burynǵy júıe qoldanylǵan tusta ata-analar birqatar kemshilikterdiń baryn jıi aıtqan bolatyn.
Sonyń birinshisi, bilim, sport jáne mádenıet basqarmalarynyń úsh túrli kezegi.
Ekinshi, «Tirkelgeni ótedi» qaǵıdasy. Munda áleýmettik osal top balalary qosymsha bilimnen tys qalyp, keı balalardyń eki vaýcher alǵany baıqalǵan.
Qala ákimdigi atalǵan olqylyqtardy joıý úshin E-ORDA ınfraqurylymyna negizdelgen QOSYMSHA.KZ memlekettik sıfrlyq júıesin engizdi.
QOSYMSHA.KZ jańalyǵy – áleýmettik jikteý
Qala ákimdiginiń habarlaýynsha, endi ótinim berý, vaýcher bólý jáne qatysýdy baqylaý bir tereze qaǵıdatymen júzege asady.
Júıeniń basty jańalyǵy áleýmettik jikteýdiń engizilýi. О́tinimder endi berilgen ýaqytyna emes, balanyń áleýmettik mártebesine qaraı suryptalady.
12 sanat bekitilgen, árqaısyna bólek koeffısıent belgilengen:
• Erekshe bilimdi qajet etetin balalar – koeffısıent 5;
• AÁK alatyn otbasylardaǵy, múgedektigi bar ata-anasy bar, jetim balalar – koeffısıent 3-4;
• Kópbalaly otbasyndaǵy balalar – koeffısıent 2;
• 4-18 jas aralyǵyndaǵy basqa balalar – koeffısıent 1.
Osylaısha, kópbalaly nemese áleýmettik jaǵdaıy tómen otbasyndaǵy bala ótinimdi keıinirek bergen kúnniń ózinde, jalpy tizimde ózgelermen salystyrǵanda joǵary orynǵa kóteriledi. Bul «kim birinshi batyrmany bassa – soǵan beriledi» degen jarysty boldyrmaı, teń qoljetimdilikti qamtamasyz etedi.
Sondaı-aq, endi vaýcher naqty bir úıirmege emes, tikeleı balaǵa beriledi. Munda ata-analar vaýcher alǵan soń úıirmeni bala jasyna, qyzyǵýshylyǵyna jáne kestesine saı erkin tańdaı alady.
QOSYMSHA.KZ-ke tirkelý qajet pe?
Tegin qosymsha bilim berý quqyǵyn paıdalaný úshin QOSYMSHA.KZ saıtyna tirkelý mindetti. Júıede ata-ana men balanyń JSN-in kórsetý, derekterdiń durystyǵyn rastaý kerek.
Memlekettik qarjylandyrýdy jalǵastyrý úshin aı saıyn Jeke kabınetke kirip, balanyń úıirmege qatysýyn rastaý da mańyzdy.
Eger bala qazirdiń ózinde qandaı da bir úıirmege baryp júrse, sol uıymǵa baryp, onyń derekterin júıege engizýdi suraý qajet.
Aıta keteıik, ótinimdi tek Astana qalasynda tirkelgen (turaqty nemese ýaqytsha) otbasylar ǵana bere alady.
