Shymbulaq taý kýrorty deregine súıensek, EcoDay senbiligine qatysqan 100-den astam erikti Ile-Alataý ulttyq tabıǵı parki aýmaǵyna senbilik júrgizgen. Aksııa barysynda jarty tonnaǵa jýyq qoqys jınalyp, 200 kıloǵa jýyǵy qaıta óńdeýge jiberildi.
Shymbulaq taý kýrorty ákimshiligi eriktilerdiń qoqysty jınap, muqııat suryptaǵanyn alǵa tartty. Olar plastıkalyq jáne shyny bótelkelerdi qaıta óńdeý úshin bir bólek suryptaǵan. Jınalǵan qoqys eriktilerdiń kúshimen Shymbulaq aýmaǵyna jetkizildi. Al qaıta óńdeletin qaldyqtar Recycle Birge qoldaýymen mamandandyrylǵan kásiporyndarǵa jetkizildi.
Almaty ákimi Darhan Satybaldy senbilikter resmı sıpatta ótpeýi kerektigin eskertip, jýyrda «Taza Qazaqstan» respýblıkalyq ekologııalyq aksııasyn iske asyrý barysyna qatysty keńes ótkizip, aýdan ákimderi, qalalyq basqarma basshylary men jaýapty mekeme ókilderimen kezdesken bolatyn. Keńes barysynda megapolıs basshysy «Taza Qazaqstan» aksııasy erekshe baqylaýda ekenin atap ótip, «Bizdiń mindetimiz – bir rettik senbilikter ótkizý emes, kóshelerde, aýlalarda jáne halyqtyń sanasynda naqty ózgeristerge qol jetkizý» dedi. Aıtýynsha, qalada áli kúnge deıin sýarý, kógaldandyrý, jaryqtandyrý, qoqys shyǵarý sııaqty máseleler sheshimin tappaǵan.
ALMATY
