Foto: Mádenıet jáne aqparat mınıstrligi
Mınıstr mádenıet pen ónerdiń shekarasyz qoljetimdiligine qol jetkizý úshin sıfrlyq múmkindikterdi paıdalaný qajet ekenin aıtty. Ol sońǵy jyldary mádenı nysandardy sıfrlyq formatqa kóshirý, avtomattandyrylǵan júıelerdi engizý baǵytynda naqty jumystar qolǵa alynǵanyn jetkizdi.
Atap aıtqanda, bıyl iske qosylatyn E-museum veb-portaly – Qazaqstan mýzeıleriniń biryńǵaı vırtýaldy alańy bolmaq. Bul platforma arqyly qoldanýshylar elimizdiń mádenı murasyn 3D úlgide, ınteraktıvti formatta kórýge múmkindik alady. Joba aıasynda memlekettik mýzeı qory elektrondy formatta úzdiksiz jańartylyp otyrady.
Sondaı-aq «Aısha bıbi kesenesinde» elektrondyq bılet júıesin engizý jumystary bastalǵan. Bul júıe beınekamera, týrnıketpen jabdyqtalyp, face ID nemese ID-karta arqyly kirý múmkindigin usynady. Osyndaı júıeler «Áziret Sultan», «Otyrar» mýzeı-qoryǵy, «Qarahan kesenesi» syndy tarıhı nysandarda da engiziledi.
«Mádenıet sıfrlanbasa – ol tuıyqtalady. Qazirgi urpaq aqparatty vızýaldy, ınteraktıvti túrde qabyldaıdy. Demek, eger biz jastardy ulttyq mádenıetke tartqymyz kelse, ony solardyń tilimen, sıfrlyq ortada sóıletýimiz kerek. Buǵan qosa, sıfrlandyrý – murany saqtaý kepili. Qaǵaz qujat pen qoljazba tozady, biraq sıfrlyq nusqa máńgi saqtalady ári álemniń kez kelgen jerinen qoljetimdi bolady», – dedi Aıda Balaeva.
