Aıtýynsha, 2014 jyly paıdalanýǵa berilgen mekeme 295 orynǵa arnalǵan jáne 18 jasqa deıingi balalarǵa hırýrgııalyq jáne somatıkalyq baǵyttar boıynsha shuǵyl ári josparly kómek kórsetedi. Sonymen qatar munda shtattyq kestege saı myńnan asa qyzmetker eńbek etedi. Aýrýhana qazirgi zamanǵy medısınalyq qural-jabdyqtarmen tolyq qamtamasyz etilgen.
«Densaýlyq saqtaý – memlekettiń basty basymdyǵy. Sol úshin de sizderdiń eńbekterińiz eleýli. Qoǵamda deni saý urpaq ósirý úshin bar kúsh-jigerimizdi salýymyz kerek», dedi Danabek Isabek.
Dárigerler óz kezeginde usynys-pikirlerin ortaǵa salyp, ózekti máselelerdi jetkizdi. Qalalyq densaýlyq saqtaý basqarmasynyń basshylyǵy medısına qyzmetkerlerin baspanamen qamtamasyz etý máselesin kóterip, qalada júrek-qan tamyrlary aýrýlary men qant dıabetiniń keń taralǵanyn aıtyp, bul baǵytta memlekettik deńgeıde arnaıy baǵdarlama qabyldanýy qajettigin eske saldy. «Búginde sozylmaly aýrýlar jasaryp keledi. Ásirese qant dıabeti men júrek aýrýlaryna shaldyqqandar kóbeıip otyr. Buǵan qarsy profılaktıkalyq sharalardy keńeıtýimiz kerek», dedi medısına mamandary.
Depýtat máseleniń ózektiligin aıtyp, dárigerler dabyly oryndy ekenin jetkizdi. Sondyqtan bul baǵytta tıisti sharalar qabyldaný kerektigin atap ótti. Osyǵan oraı Parlamentte densaýlyqqa qatysty másele kóterip, salany jaqsartýǵa arnalǵan keshendi josparlar qabyldanýyna yqpal etetinin málimdedi.
Sapar barysynda D.Isabek taǵy birneshe áleýmettik nysandy aralap, turǵyndarmen kezdesti. Sonyń ishinde Asar shaǵyn aýdanynyń aýyl bılerimen jáne aqsaqaldarymen júzdesti. El aǵalary depýtattyń jumysyna oń baǵasyn berip, zań shyǵarýshy organ jumysyn BAQ pen áleýmettik jeli arqyly bilip otyrmyz dedi. Asarda ınfraqurylym máselesiniń sheshimin taýyp jatqanyna qýanyshty ekenderin bildirdi. Alaıda mektep pen mádenıet úıi sııaqty áleýmettik nysandardyń qajet bolyp turǵanyn jetkizdi. D.Isabek bul ótinishti nazarǵa alyp, onyń oryndalýyna kúsh salatynyn aıtty.
Budan keıin depýtat Bozaryq shaǵyn aýdanynda bolyp, kópqabatty turǵyn úılerdiń qurylys barysymen tanysty. Atalǵan aýmaqta búginde 5-9 qabatty onnan astam turǵyn úı salynyp jatyr. Osyǵan baılanysty bıyl megapolıste 1 mln 370 myń sharshy metr turǵyn úı paıdalanýǵa berilmek. Depýtat turǵyn úı qurylysyndaǵy bastamalarǵa kóńili tolatynyn jáne qala qurylysyn jandandyra berý qajettigin atap ótti.
Sonymen qatar О́.Joldasbekov atyndaǵy №9 IT lıseıinde bolyp, bilim ordasynda júrgizilip jatqan kúrdeli jóndeý jumystarymen tanysty. 90 jyldyq tarıhy bar lıseıde kópten beri kúrdeli jóndeý jumystary júrgizilmegen edi. Úsh ǵımarattan turatyn, myńnan astam stýdent oqıtyn arnaýly bilim uıasynda qurylys jumystary bıyl sáýirde bastalǵan. Merdiger mekeme ókilderi qurylys kestege sáıkes júrgizilip jatqanyn, barlyq jumys jańa oqý jyly bastalǵanǵa deıin aıaqtalady dep sendirdi. «Jumysty tez bitirýdi ǵana oılamaı, sapaǵa da erekshe mán bergen jón. Bul nysan partııanyń saılaýaldy baǵdarlamasyna engen. Sondyqtan barlyq jumys partııa tarapynan erekshe baqylaýda ekenin aıtqym keledi», dedi D.Isabek.
Sonymen birge D.Isabek qaladaǵy taǵy bir №7 IT mektep-lıseıiniń jaı-kúıimen tanysyp qaıtty. 1963 jyly paıdalanýǵa berilgen 1 200 oryndyq bul mektep qaladaǵy kóne bilim mekemeleriniń biri bop sanalady. Sońǵy ret 2014 jyly kúrdeli jóndeýden ótken eken. Sol sebepti, bilim uıasynyń tereze, esik, shatyry jańartylǵanymen, báribir ǵımarattyń ózi qaıta jóndeýdi qajet etedi. Máselen, ǵımarattardyń bir-birimen jalǵanǵan tustary ajyraı bastaǵan, aýla qorshaýy men sport alańy da eskirgen. Memlekettik saraptamanyń oń qorytyndysy shyqpaýyna baılanysty jóndeý jumystary áli bastalmaǵan. D.Isabek bul máseleni nazarda ustap, tıisti sala mamandarymen birlesip sheshý joldaryn qarastyratynyn málimdedi. Aıta ketý kerek, depýtat buǵan deıingi saparynda da atalǵan mekteptiń tozǵanyn aıtyp, kúrdeli jóndeý máselesin kótergen bolatyn.
Depýtattyń jumys sapary «Quqyqtyq kómek» partııalyq jobasy aıasynda azamattardy jeke máseleleri boıynsha qabyldaýmen jalǵasty. Is-sharaǵa «Amanat» partııasy Shymkent qalalyq fılıaly atqarýshy hatshysynyń orynbasarlary Bekaıdar Tólegenov pen Erbol Baıqonysov, qala ákimdiginiń basqarma ókilderi, aýdan ákimdikteri men quqyq qorǵaý organdarynyń qyzmetkerleri qatysty. Bul kúni 20-dan astam azamat depýtattyń qabyldaýynda boldy. Turǵyndar ınfraqurylym, densaýlyq saqtaý, áleýmettik qamtamasyz etý, quqyq qorǵaý jáne jer máselelerine qatysty suraqtarǵa jaýap alý úshin keldi. Ásirese balalary sottalyp ketken ata-analardyń janaıqaıy jurttyń qulaǵyn eleń etkizdi. Olardyń aıtýynsha, balalary esirtki tasymaldaý isimen aınalysqany úshin uzaq merzimge bas bostandyǵynan aıyrylǵan. Sondyqtan Raqymshylyq týraly zań aıasynda keshirim berilsin degen ótinishpen kelipti.
«Meniń ulym esirtki qylmysymen 17 jylǵa sottalyp ketti. Zańǵa qaıshy áreketke barǵanyn moıyndaımyn, biraq ol muny bilmestikpen jasap qoıdy. Sondyqtan memleketten raqymshylyq berýin suraımyn» dedi ata-ananyń biri. Depýtat sot sheshimine aralasýǵa bolmaıtynyn eskertti, degenmen máseleni zań sheńberinde qarastyryp kórýge ýáde berdi.
«Zańdy bilmeý jaýapkershilikten bosatpaıdy. Ony barlyǵymyz jaqsy bilsek kerek. Sot sheshimine eshkimniń aralasýǵa quqy joq. Deı turǵanmen, Raqymshylyq týraly zańda naqty tártip pen talaptar bar, aldymen sony eskerip kórý qajet», dedi.
Májilis depýtatynyń sapary Shymkent qalasyndaǵy «Izetti zeınetker» mekemesinde jalǵasyn tapty. Atalǵan ortalyq «Amanat» partııasynyń saılaýaldy baǵdarlamasy aıasynda qurylǵan bolatyn. 2023 jyldyń 1 qarashasynan bastap jumysyn bastaǵan mekeme – zeınet jasyndaǵy azamattarǵa qysqa merzimde demalý men em alý múmkindigin syılaıtyn biregeı keshen. Alǵashynda 70 orynǵa eseptelgen bul ortalyq búginde tıisti basqarmanyń joldamasymen bir mezette 120 zeınetkerdi qabyldaı alady. Mekeme ǵımaratynyń jalpy aýmaǵy 4 000 sharshy metrge jýyq. Demalýshylar úshin taza aýada serýendeýge arnalǵan aýla, jasyl alańdar, oryndyqtar, sý burqaqtar men shaǵyn saıabaq qarastyrylǵan. Mundaı múmkindikter qarııalardyń tynyǵýyna, psıhologııalyq demalýyna qolaıly jaǵdaı týǵyzady.
Ortalyqta demalýshylar medısınalyq jáne áleýmettik qyzmetpen tolyq qamtylǵan. Ár zeınetker dáriger qabyldaýynda bolyp, densaýlyǵyna qaraı arnaıy emdik sharalardan ótedi. Qyzmet túrleriniń ishine fızıoterapııa, sýmen emdeý, elektromagnıtti terapııa, dárilik shóp tunbalarymen emdeý, salamatty ómir saltyn ustanýǵa arnalǵan tańǵy emdik jattyǵýlar, arnaıy trenajer zaldary men tuzdy shahta sekildi emdik sharalar kiredi. Depýtat saýyqtyrý kesheniniń jumysymen jan-jaqty tanysyp, qyzmet sapasyn baǵalady. Qarııalarmen kezdesip, hal-jaǵdaıyn surap, ortalyqtyń «Amanat» partııasynyń saılaýaldy baǵdarlamasynda kózdelgen mańyzdy áleýmettik jobalardyń biri ekenin atap ótti.
«Saýyqtyrý kesheni qarttarymyzdyń salamatty ǵumyr keshýine yqpal etetin mańyzdy ortalyq. Kórip otyrǵandaı bul jerde qarııalarǵa jan-jaqty jaǵdaı jasalǵan. Mundaı úlgili ortalyqtar elimizdiń basqa óńirlerine de kerek eken», dedi depýtat.
«Izetti zeınetker» ortalyǵyna joldama alý tásili tolyq sıfrlandyrylǵan. Zeınetkerler geo-shym.kz portaly arqyly elektrondyq sıfrlyq qoltańbamen tirkelip, onlaın ótinim bere alady. О́tinish bergennen keıin kezek retin de elektrondy júıe arqyly baqylaýǵa múmkindik bar.
