ALMATY-ÚRIMShI BAǴYTYMEN JAŃA ÁÝE JOLY AShYLMAQ

Sońǵy ýaqytta Qazaqstan men Qytaı arasyndaǵy saýda-ekonomıkalyq qarym-qatynas aıasy ulǵaıa túsýde. Soǵan oraı, eki el arasyndaǵy áýe qatynasy baǵytynda da birqatar is-sharalar júzege asyrylýda. Anyǵyraq aıtqanda bıylǵy 2010 jyldyń ekinshi shildesinen bastap “Almaty-Úrimshi” baǵyty boıynsha jańa reıs, áýe qatynasy óz jumysyn bastaıdy. “Eırbas-A320” yńǵaıly áýe kemesi Almaty qala­sy­nan Úrimshige aptasyna úsh ret, ıaǵnı sársenbi, juma jáne jeksenbi kúnderi ushady. Al, Úrimshiden Almatyǵa qaraı reıs beısenbi, senbi jáne jeksenbi kúnderi oryndalady. Bul jóninde “Eır-Astana” áýe kom­pa­nııa­sy­nyń Almatyda ótken baspasóz má­slı­ha­tynda jan-jaq­ty túrde baıandaldy. Jıynda sóz alǵan “Eır Astana” AQ prezıdenti Pıter Foster “eki qala ara­syndaǵy jańadan ashylǵan áýe baǵytynyń Qa­zaq­stan men Qytaı ara­syn­daǵy qoǵamdyq-saıası jáne eko­no­mıkalyq baıl­a­nys­tardyń odan ári damýyna aı­tarlyqtaı yqpal etetindigin atap aıtty. – Kópshilikke belgili, Qazaqstan men Qytaı ara­synda saýda-kelisim sharttardyń kólemi ýaqyt ótken sa­­ıyn arta túsýde. Búginde “Eır-Astana” áýe kom­pa­nııa­sy Almatydan Pekınge jáne Astanadan Úrimshige ushýdy júzege asyrýda, degenmen bul reıster qazirgi tańda kópshilik suranysyn qanaǵattandyrmaı otyr. Bul oraıda atap aıtarlyq jáıt, jańadan iske qosylyp otyrǵan “Almaty-Úrimshi” baǵyty bizdiń áýe kompanııamyz úshin bolashaǵy zor jańa naryqty ashyp, tyń tabystarǵa jol ashpaq, – deıdi Pıter Foster óz oıyn ortaǵa salyp. “Eır-Astana” áýe kompanııasy basshysynyń pi­ki­rin­she, eki el arasyndaǵy reısterdi júzege asyrý kezeńinde 350 myńǵa jýyq jolaýshynyń jáne 6093,8 tonna júktiń tasymaldanýy – áýe qatynasyna degen joǵary qajettiliktiń kepili. Bıylǵy jyldyń ótken bes aıynda, ıaǵnı qańtardan mamyr aıyna deıin “Eır-Astana” 8457 jolaýshyǵa qyzmet kórsetkendigi de kóp nárseden habar berse kerek. Úrimshi – sondaı-aq, kásipkerler men týrısterden basqa emdelýge jáne demalýǵa keletinder jáne QHR-dyń Sınszıan-Uıǵyr avtonomııaly aımaǵynyń mádenıeti men dástúrin zertteýshilerdiń de nazaryn ózine aýdarýda. Sóz reti kelgende aıta ketetin taǵy bir jáıt, “Almaty-Úrimshi” baǵytyndaǵy áýe bıletterdiń quny tym qymbat emes, ol – 27000 teńge. Al, bıznes-klass sanatyndaǵy oryndar baǵasy eki jaqqa – 140000 teńgeden bastalady. Ushý uzaqtyǵy 1 saǵat 50 mınótti quraıdy. Bıletterdi brondaý úshin aqparat ortalyǵyna +7 (727) 244-44-77 telefony boıynsha habarlasýǵa bolady. Sóıtip, Úrimshige jolaýshylap barǵandardy bul ólkeniń ádemi tabıǵaty, ejelgi tarıhı eskertkishteri, saýda alańdary kútýde. Baqyt BALǴARINA. ALMATY.