2025 jylǵy 19 mamyrdan beri Gazaǵa azyq-túlik, dári-dármek jáne basqa da alǵashqy qajettiliktegi zattardy tıegen 2013 júk kóligi jetkizilgen. Alaıda olardyń tek 260-y ǵana naqty alýshylarǵa jetken. Qalǵan 1753 júk kóligi Palestına aýmaǵynda ne kúshpen basyp alynǵan, ne urlanǵan. Erekshe kúrdeli jaǵdaı 31 mamyrda oryn alǵan – sol kúni 1695 tonna gýmanıtarlyq kómekti alyp kele jatqan 90 júk kóligi tonalǵan.
BUU-nyń jobalyq qyzmetter basqarmasynyń (UNOPS) ókilderi kómektiń urlanýy eki túrli jolmen júretinin aıtady: keıde ash adamdar taýarlardy tikeleı kerýennen beıbit jolmen tartyp alady, al keıde qarýly toptar kúshpen tartyp alady.
Sarapshylardyń aıtýynsha, bul aýqymdy urlyqtar Gaza sektoryndaǵy asa aýyr gýmanıtarlyq daǵdarysty odan ári ýshyqtyryp otyr. Azyq-túlik pen dári-dármek tapshylyǵy beıbit turǵyndardyń ómirine tikeleı qaýip tóndirýde. Halyqaralyq uıymdar jalǵyz sheshim – kómekti qaýipsiz jáne turaqty jetkizý joldaryn jolǵa qoıý dep sanaıdy.
Alaıda jaǵdaıdy qıyndatyp turǵany – Izraıl men batys sarapshylarynyń málimetinshe, keıbir qarýly toptar gýmanıtarlyq júktiń júıeli túrde tonalýyna qatysyp, ony qara bazarda satady jáne sol arqyly óz qyzmetin qarjylandyrady.
Eske salaıyq, Izraıl áskeri Gazanyń ortalyq bóligindegi turǵyndardy ońtústikke evakýasııalanýǵa shaqyrdy, sebebi Deır-el-Balah qalasynda áskerı operasııalardy keńeıtý josparlanǵan. BUU-nyń gýmanıtarlyq máselelerdi úılestirý basqarmasy bul áreketti «jappaı qýǵyndaýǵa buıryq» jáne «soǵys sharpyǵan aımaqtaǵy gýmanıtarlyq kúsh-jigerge soqqy» dep qatań synǵa aldy. Uıym málimetinshe, evakýasııa týraly málimdeme jasalǵan sátte bul aımaqta 50–80 myń adam bolǵan, olardyń qatarynda shatyrlarda ómir súrip jatqan myńdaǵan bosqyn da bar. Qazirdiń ózinde myńnan astam otbasy qaqtyǵys aımaǵynan ketýge májbúr bolǵan.
