Sýret: instagram.com/mfa_kz
«ROX Group» – 1996 jyly negizi qalanǵan Vetnamdaǵy eń iri jekemenshik kópsalaly holdıngterdiń biri. Kompanııa energetıka, development, qarjy, ınfraqurylym jáne qonaqúı bıznesi salalaryna ınvestısııa salady. Toptyń portfelinde 12 elde 100-den astam ınvestısııalyq nysan bar, al sheteldik ınvestısııalardyń jalpy kólemi 3 mıllıard AQSh dollarynan asady.
Halyqaralyq aýqymdaǵy kóshbasshy jobalarynyń qatarynda – qýattylyǵy 1900 MVt bolatyn kún elektr stansasy jáne Bishkektegi aýqymdy ýrbanıstik klasterdi qamtıtyn megajoba bar.
Al elimizde «ROX Group» kompanııasy jańartylatyn energııa kózderi salasynda, onyń ishinde iri energetıkalyq nysandar salý jobalaryn iske asyrýǵa qyzyǵýshylyq bildirdi. Sonymen qatar kompanııa ónerkásiptik jáne týrıstik ınfraqurylymdy damytý jobalaryna qatysý múmkindigin qarastyryp, bank jáne qarjy sektoryna da qyzyǵýshylyq tanytyp otyr.
Kezdesý barysynda Á.Qýantyrov elimizdiń strategııalyq áriptestikke jáne elde uzaqmerzimdi qatysýǵa baǵyttalǵan ınvestorlardy tartýǵa múddeli ekenin atap ótti.
– Maqsatymyz – tek ınvestısııalyq aǵyndardy arttyrý emes, sapaly, tehnologııalyq jáne ornyqty jobalardy tartý. Biz «ROX Group» sııaqty kompanııalar bastamalaryn Qazaqstanda senimdi túrde júzege asyra alatyndaı jaǵdaı jasaýǵa umtylamyz. Bul jobalar el ekonomıkasyna naqty áser etýge tıis, – dedi Syrtqy ister mınıstriniń orynbasary.
О́z kezeginde Le An Dyk Qazaqstannyń geografııalyq ornalasýy, saıası turaqtylyǵy jáne ınvestısııalyq tartymdylyǵynyń erekshe úılesimine ıe ekenin aıtty. Onyń sózinshe «ROX Group» elimizdegi iskerlik ahýaldy jáne Úkimettiń ınvestorlardy qoldaýǵa baǵyttalǵan is-sharalaryn joǵary baǵalaıdy. Sondaı-aq ol elimizde energetıka, logıstıka jáne qarjylyq qyzmetter sııaqty salalarda úlken áleýetke ıe ekenin jáne kompanııanyń óńirlik strategııasynda negizgi býynǵa aınala alatynyn jetkizdi.
Taraptar syndarly dıalogti jalǵastyrýǵa jáne yntymaqtastyqtyń naqty baǵyttaryn birlesip pysyqtaýǵa daıyn ekenderin bildirdi. Elimiz tarapynan ınvestısııalyq múmkindikterdi zerdeleýge, jobalardy súıemeldeýge, salalyq memlekettik organdarmen jáne damý ınstıtýttarymen ózara is-qımyl jasaýǵa jan-jaqty qoldaý kórsetiletini rastaldy.
