Medısına • 06 Tamyz, 2025

Memleket MÁMS-ke tóleıtin jarna kólemin ulǵaıtady

90 ret

kórsetildi

2 mın

oqý úshin

2027 jyldan bastap Qazaqstanda mindetti áleýmettik medısınalyq saqtandyrýǵa memleket tarapynan túsetin jarnalardyń mólsheri birtindep artady. Bul týraly Densaýlyq saqtaý mınıstrligi MÁMS júıesin jetildirý jáne taldaý departamentiniń dırektory Lázzat Shomanova Ortalyq kommýnıkasııalar qyzmetinde ótken brıfıngte málimdedi, dep jazady Egemen.kz.

Dana MYRZAQADIR

Memleket MÁMS-ke tóleıtin jarna kólemin ulǵaıtady

Foto: egemen.kz/ Erlan Omar

«Biz 2015 jyly qabyldanǵan «Mindetti áleýmettik medısınalyq saqtandyrý týraly» QR Zańynyń alǵashqy redaksııasynda belgilengen bastapqy qarjylyq modeline ishinara oralamyz. Sol kezde memlekettiń jarnalary 7% deńgeıinde bekitilgen edi. Qazir ol tek 2% ǵana», dedi L.Shomanova.

Onyń aıtýynsha, bul jumysshylar men jumys berýshilerdiń tóleıtin jarna kólemin ulǵaıtpaı, medısınalyq kómek júıesiniń uzaq merzimdi turaqtylyǵyn qamtamasyz etedi.

Memlekettiń qarjylandyrý úlesiniń kezeń-kezeńimen ósýiniń nátıjesinde, jarna mólsheri bıylǵy 2%-dan 2037 jylǵa qaraı 4,7%-ǵa deıin artady dep boljanyp otyr. Bul júıege qosymsha 2,8 trıllıon teńge qarjy tartýǵa múmkindik bermek. Al ol óz kezeginde halyqqa medısınalyq kómektiń qoljetimdiligin arttyrýǵa zor úles qosady.

Sondaı-aq endi MÁMS júıesine bes jyl boıy turaqty tólem jasaǵan adamnyń saqtandyrylǵan mártebesi 6 aıǵa deıin saqtalady.
L.Shomanova bul norma turaqty túrde júıege qatysyp kelgen, biraq ýaqytsha qıyndyqqa tap bolǵan azamattardy qoldaýǵa múmkindik beretinin aıtty.

Sonymen birge, zańnamaǵa ashyqtyqty arttyrýǵa baǵyttalǵan ózgerister engizilgen:

- Medısınalyq uıymdar men Qordyń qyzmeti ashyq ári esep berýge mindetti bolady;
- Medısınalyq jáne farmasevtıkalyq baqylaý komıtetine qadaǵalaý quzyreti berildi. Olar arnaıy qujatsyz medısınalyq qyzmet kórsetýdi anyqtasa, birden toqtata alady.

Bul ózgerister halyqtyń medısınalyq saqtandyrý júıesine degen senimin nyǵaıtýǵa jáne qatysý sharttaryn ádil etýge baǵyttalǵan.