Sport salasyna ólsheýsiz eńbek sińirgen bilikti mamanyń shákirtteri álemdik arenada el namysyn qorǵady. Olardyń qatarynda Ilıa Ilın, Almas О́teshov, Qýanysh Rahatov, Oleg Shın, Roman Rýsınovskıı jáne Aleksandr Zaıchıkov syndy tanymal sportshylar bar. Sonymen qatar, jattyqtyrýshy 60-tan astam sport sheberin, 12 halyqaralyq dárejedegi sport sheberin jáne 3 Qazaqstan Respýblıkasynyń eńbek sińirgen sport sheberin tárbıelep shyǵarǵan.
Bıyl tuńǵysh ret ótkizilip otyrǵan bul respýblıkalyq dodaǵa elimizdiń barlyq óńirinen 10 komanda qatysyp, 100-ge jýyq ziltemirshi 8 túrli salmaq dárejesi boıynsha synǵa túsedi. Jarysqa erler de, áıelder de qatysýda.
Ashylý saltanatyna oblys ákiminiń orynbasary Meırambek Shermaǵanbet, jattyqtyrýshy Vılorıı Pak jáne oblystyq aýyr atletıka federasııasynyń prezıdenti Temirhan Berdáliuly qatysyp, sportshylarǵa sáttilik tiledi.
Jarys jeńimpazdary arnaıy medaldarmen jáne qomaqty syıaqylarmen marapattalady. Týrnır 13 tamyzǵa deıin jalǵasady.
