Kolledj aýlasyna engen bette-aq jaıqalǵan jasyl jelekke kóz súısinip, kóńil meıirlendi. Jol jıegindegi ásem gúlder, anaý bir jerdegi jylyjaı, ǵımarat janyndaǵy bitimi bólek aǵashtar, rasymen, janyńdy shýaqqa bóleıdi. Florıstıka mamandyǵyn oqytatyn Astanadaǵy jalǵyz kolledjdiń keremetin osylaı aýlasynan-aq ańǵardyq. Dál qazir oqýǵa qujat tapsyrý ýaqyty júrip jatqandyqtan, Qabyldaý qomıssııanyń jaýapty hatshysy Kamıla Anapııaqyzymen jolyǵyp, stýdentterdiń osy florıstıka mamandyǵyna degen qyzyǵýshylyǵyn bilgimiz keldi.
«Florıstıka» mamandyǵy boıynsha alǵashqy stýdentter 2024 jyly qabyldanyp, búginde 10 stýdent bilim alyp jatyr. Jańa oqý jylyna 25 stýdent qabyldaý josparlanyp otyr. Onyń ishinde 10 stýdent erekshe bilim berýdi qajet etedi. Bolashaq florıster 2 jyl 10 aı boıy kolledj bazasyndaǵy zerthanalarda jáne bizdiń áleýmettik seriktester qoldaýymen tájirıbeden ótedi. Bul mamandyqty tańdaǵan talapkerlerdiń bıologııa, matematıka jáne oqytý tiline baılanysty qazaq jáne orys tiliniń ortasha baǵasy esepteledi. Sonymen qatar suhbattasý júrgiziledi. Biz 9-synypty bitirgen talapkerlerdi qabyldaımyz, olar oqýǵa túsken jaǵdaıda memlekettik grant esebinen bilim alady. Oqý ordasynda osyǵan uqsas landshaftyq dızaın, orman sharýashylyǵy mamandyqtary da oqytylady. Jalpy, búginde bul mamandyqtar boıynsha 60 stýdent bilim alyp jatyr», deıdi Kamıla Anapııaqyzy.
Iá, kópshilik florıst dese tek gúl shoqtaryn qıyp-kesip, ádemi býket jasaıtyn mamandy elestetedi. Shyn máninde, bul mamandyq tek gúldermen jumys isteýdi ǵana emes, sonymen qatar shyǵarmashylyq, estetıka jáne servıs salasyndaǵy bilim men daǵdyny qajet etedi. Názik gúlderdiń kútimine úlken yqtııattylyq kerek. Kolledj dırektorynyń mindetin atqarýshy Gaýhar Ramazanovanyń aıtýynsha, osy oqý ornynda florıstıka mamandyǵyna úıretetin arnaıy bilikti oqytýshylar bar.
«Jas mamandarǵa nıderlandtyq «Flower Circus» kompanııasy sheberlik sabaǵyn ótkizip turady. Oqytýshylarymyz Reseıdiń Tatarstan aımaǵynda «Florıstıka» mamandyǵy boıynsha halyqaralyq taǵylymdamadan ótken. Odan bólek, kolledj «Romantic» gúlder ortalyǵy, «QazFlor» gúl dúkenimen jáne orman sharýashylyǵy mamandyǵy boıynsha «Astana-Zelenstroı», «Jasyl aımaq» sııaqty kompanııalarmen tyǵyz jumys isteıdi. Osy baılanystyń nátıjesin stýdentterimiz qazirdiń ózinde kórsetip, dáleldep jatyr. Máselen, bıyl kolledj túlegi Erjan Baltabaı respýblıkalyq «EuroSkills Herning» 2025» baıqaýynyń irikteý kezeńinde jeńiske jetip, Nıderlandtaǵy konkýrsqa joldama utyp aldy. Odan bólek, bıyl Astanada ótken «Jumysshy mamandyqtary» festıvalinde stýdentterimiz landshaftyq jobalardy tanystyryp, estetıkalyq elementterdi ornalastyrý boıynsha sheberlik saǵattaryn ótkizdi», deıdi Gaýhar Ramazanova.
Kolledjdiń «Florıstıka», «Landshaft dızaıny», «Oranjerııa», «Gıdroponıka» zerthanalaryn aralaý barysynda túrli jaıtqa qanyq boldyq. Stýdentter «Sarygúl», «Arystan aýyz gúli», «Qyzylgúl», «Áıel baqyty» sııaqty túr-túrli gúldi ózderi egip, ósirgen eken. Tipti osylardyń keıbirin býdandastyryp, jańa sorttar shyǵarypty. Qýraǵan gúlderdiń de kúltesin tastamaı, olardy keptirip, túrli buıym jasap, qaldyqqa ekinshi ómir syılaǵandaryna da kóz jetkizip, tańdaı qaqtyq.
Orman sharýashylyǵy mamandyǵynyń bólim meńgerýshisi Alýa Temirbekovanyń aıtýynsha, kolledj aýmaǵynda jylyjaı ornalasqan. Onda orman sharýashylyǵy boıynsha bilim alatyn stýdentter kókónister men jıdekterdi kútip baptaıdy.
«Jylyjaıymyzda túrli jemister men kókónister ósiriledi. Olardy stýdentter oqytýshylarymen birigip, kútip-baptaıdy. «Baqshadan – dastarqanǵa» jobasy aıasynda qazir Qyzylorda óńirinde keńinen taralǵan «Ámire» qaýyny ósirilip jatyr. Onyń salmaǵy 15 kıloǵa deıin jetedi. Aıta keteıik, respýblıka boıynsha landshaftyq dızaın, orman sharýashylyǵy, florıstıka mamandyqtarynyń «WorldSkills» jarystary osy kolledjdiń bazasynda uıymdastyrylady», dedi Alýa Temirbekova.
Shyny kerek, qoǵamda florıstıka tek áıelder aınalysatyn mamandyq degen qate túsinik bar. Al shyn máninde naǵyz naýbaıshylar men myqty aspazdar, kreatıvti dızaınerler erlerden shyǵatyny sekildi, fantazııasy bólek florıstterdiń de qataryn er azamattar toltyratyny belgili. Oǵan osy oqý ornynyń bıylǵy túlegi Erjan Baltabaı anyq mysal bola alady. Ol qazir shetelde ótetin saıysqa qyzý daıyndyq ústinde.
«Florıstıka – bul tek gúldermen jumys emes, bul – aınalaǵa emosııa syılap, sulýlyqty jetkizý óneri. Iá, men bul mamandyqty jumys dep emes, óner dep túsinemin. Osy salany tańdaǵan sebebim de sol, tabıǵat tamashalaryn úılestire otyryp, adamdarǵa qýanysh syılaǵym keledi. Dál qazir Nıderlandta ótetin «EuroSkills» jarysyna daıyndyq óte qarqyndy júrip jatyr. Kún saıyn florıstıka boıynsha túrli tehnıkany qaıtalap, kúrdeli kompozısııalar jasaýmen aınalysamyn. Ásirese shyǵarmashylyq oılaý qabiletimdi shyńdap jatyrmyn. О́ıtkeni florıstıka sheberlikti ǵana emes, sonymen qatar jaýapkershilik pen úlken yjdaǵattylyqty, baıqampazdyqty talap etedi», deıdi E.Baltabaı.
Rasymen, florıst mamany – ómirlik mańyzy bar kásip ıesi. Bul kolledjden tek gúlderdiń hosh ıisi ǵana emes, eńbektiń, izdenistiń, shyǵarmashylyqtyń ıisi seziledi. Osyndaı zamanaýı bilim men praktıkany ushtastyrǵan oqý orny erteńgi kúni eldiń sánin kirgizetin florıst mamandaryn tárbıelep otyr. Olar qazirdiń óndiriste, halyqaralyq deńgeıde óz oryndaryn taýyp, kásipterin dóńgeletip júr.
