Jınalǵandar aldymen bir mınýt únsizdikpen qyzmet barysynda qaza tapqan ulandyq jaýyngerlerdi eske aldy. Sodan keıin batyr sarbazdyń ákesine sóz berildi.
«Bizdiń balamyz aldymen bir jyl boıy ózin-ózi áskerge daıyndady. Armııaǵa óz yqtııarmen attandy. Ol ofıser bolsam dep armandady. Biraq ottaı jalyndap turǵan ulymyzdy sum ajal aramyzdan erte alyp ketti. Ol Otanyn qorǵaý jolynda erlikpen qaza tapty. Taǵdyrǵa kónbeske amal joq. Eń bastysy qaıǵyly oqıǵalar qaıtalanbasyn, ár sarbaz úıine aman-esen oralsyn. El aman, jurt tynysh bolsyn», dedi E.Amanuly.
Sondaı-aq batyrdyń anasy da jaýyngerler aldynda sóz sóıledi.
«Kez kelgen jerde Ulttyq ulan sarbazyn keziktirgende ulymdy kórgendeı bolamyn. Árqashan senderdiń amandyqtaryńdy tilep júrgen ata-analaryńnyń kóńilin qaldyrmańdar. Analaryńa múmkindik bolǵan kezde jıi-jıi habarlasyp turyńdar. Meniń Aıbatym sender sekildi jaýynger bolyp, antyna adaldyq tanytty. Ol maǵan jıi habarlasatyn. Sońǵy ret ómirden óter aldynda, ıaǵnı Jańa jyl kúni sóılestik. Sonda batyr ulymnyń daýysyn eń sońǵy ret estigen ekenmin», dedi ol.
Is-shara barysynda Aıbat Amanov týraly derekti fılm kórsetildi.
«Ulttyq ulan sarbazdary árqashan eldik pen erliktiń asqaq úlgisin kórsetip keledi. Sizderdiń uldaryńyz – Otan úshin janyn pıda etken batyrymyzdyń biri. Onyń antqa adal, sózge berik naǵyz jaýynger bolǵanyn bilemiz. Sondyqtan osyndaı azamatty ómirge ákelgen sizderdiń aldaryńyzda bas ıip, alǵysymyzdy bildiremiz», dedi 5573 áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Aslan Orazalın.
