«Búl másele kún tártibinde tur. Deklarasııalar 17 qyrkúıekke deıin ótkiziledi. Jyldyń sońyna deıin jarııalanady. Byltyr zańdastyrylǵan nysandarǵa qatysty aqparattar jarııalanady. Deklarasııada jalaqy kórsetilmeıdi. Sebebi biz qarjy mınıstrligi ony kórip otyrmyz. Deklarasııada tek aktıvterdiń qozǵalysy kórsetiledi», – dedi Mádı Tákıev úkimette ótken baspasóz brıfınginde Ulysmedia tilshisiniń suraǵyna.
Ulttyq ekonomıka mınıstri Serik Jumanǵarın dekalarasııada byltyrǵy jyly satyp alynǵan dúnıe-múlik kórsetiletinin aıtyp, jýrnalısterge qarata «sizder úshin jyldyń sońy qyzyqty bolady» dedi.
Memlekettik kiris komıtetiniń aqparatyna sáıkes, Qazaqstanda tabys deklarasııasyn tapsyratyn memlekettik qyzmetker sany – 580 myń. Buǵan memlekettik qyzmetkerge teńestirilgen adamdar jáne olardyń jubaılary da kiredi.
Kiris komıtetiniń málimetinshe, deklarasııasy ashyq derekkózge salynatyn saıası jáne ákimshilik qyzmetkerlerdiń tizimin memlekettik qyzmet isteri jónindegi organnyń usynysymen Qazaqstan prezıdenti bekitedi.
Al deklarasııa derekteri memlekettik organdardyń, uıymdardyń, joǵarǵy sottyń resmı ınternet-resýrstarynda jarııalanady.
Bılik tabys deklarasııasyn jarııalaý – zańsyz tabyspen jáne jemqorlyqpen kúres dep sanaıdy.
Qazaqstanda jalpyǵa ortaq deklarasııa tártibine sáıkes, 2024 jyly zańdy tulǵalardyń basshylary men quryltaıshylary, jeke kásipkerler, sondaı-aq olardyń jubaılary tabys deklarasııasyn tapsyrǵan.
Bıyl qalǵan azamattar tabys deklarasııasyn tapsyrýǵa tıis edi. Alaıda byltyr qarashada prezıdent usynysynan keıin qarjy mınıstrligi qarapaıym azamattardy deklarasııa tapsyrýdan bosatqan.
