24 JAMPOZ JARTYLAI FINALǴA JETTI

Sársenbi kúni Astanada Boks federasııasynyń uıymdastyrýymen eresekter arasynda Elbasy kýbogy jolynda ótip jatqan II halyqaralyq týrnırdiń shırek fınaldyq kezdesýleri ótti. Munda Qazaqstan quramasynda shırek fınalǵa joldama alǵan 32 boksshynyń arasynda 24 bylǵary qolǵap ıesi kelesi aınalymǵa shyq­ty. Jartylaı fınalǵa joldama alǵan boksshylardyń deni ulttyq qura­manyń ókilderi bolǵanyna baıla­nysty olardyń kóbi bir-birimen qol­ǵap túıistirdi. Onda bıyl­ǵy respýb­lıka chempıonaty­nyń aqtyq synynda joldary túıisken 69 kg. salmaqtaǵy Rústem Sybaev pen Serik Sápıev, 81 kg. salmaqtaǵy Almat Serimov pen Azamat Belgibaev kezdesti. Es­teri­ńiz­de bolsa, Qazaqstan chempıo­na­tynda Rústem men Almat qarsylas­taryn qınalmaı jeńgen edi. Son­daı-aq, jar­tylaı fınalda Nur­dáý­let Jar­manov pen Álibı Nur­matov (75 kg.), Dáýren Eleý­sinov pen Danabek Sýjanov (75 kg.) kez­desse, Marat Qııasov (81 kg.) kýba­lyq Irosbanıs Dıývergel Avıles­pen, Danııar Ústembaev (91 kg.) onyń jer­lesi Lınıer Ýnıse Pero Jýs­tın­­men kúsh synasty. Sony­men birge asa aýyr salmaqta Ivan Dychko men Rýslan Myr­sataevtyń joly túıisse, Dosjan Ospanov sırııalyq Soýmar Hýs­sýn­­men kez­desti. Osy jerde jar­ty­laı fınal­da odan basqa taǵy bir sırııa­lyq boksshynyń óner kór­set­kenin atap ótkenimiz jón. Moham­mad Hýssýn 91 kg. salmaqta ýkraınalyq Alek­sandr Ýsınmen qolǵap túıistirdi. Al jeńil salmaqta Qazaqstan qura­masynda Birjan Jaqypov, Mardan Berikbaev (48 kg.), Nurǵazy Júsipov, Mıras Jaqypov (51 kg.), Danııar Tólegenov (54 kg.), Mádı Sholaqov (57 kg.), Ǵanı Jaılaýov, Aıdar Ámirzaqov, Samat Báshenov (60 kg.), Mereı Aqshalov, Ádilet Egi­zekov (64 kg.) jartylaı sy­nǵa jol­dama aldy. Bul kezdesýlerde Samat Ýkraınanyń olım­pıada chempıony Vasılıı Lomachenko­men kúsh synas­sa, Mıras reseılik ta­lant­ty boks­shy Ǵaıyrbek Germa­hanov­pen kez­desti. Osy jekpe-jekter gazet beti qattalyp jatqanda ótken­dik­ten olardyń nátıjelerin kelesi nómir­de habarlaýdy jón kórip otyrmyz. Sóıtip, Qazaqstan quramasy­nan 24 boksshy jartylaı fınalǵa shyqsa, Reseıden úsh boksshy – Ǵaıyr­bek Ger­mahanov, Vıslan Dal­haev, Alek­sandr Bespýtın shyq­ty. Kýbadan – Iosvanı Vıeıta Soto, Norlan Vera Dıas jáne jo­ǵaryda atalǵan Iros­banıs Dıýver­hel Avıles pen Lınıer Ýnıse Pero Jýstın joldama aldy. Bıylǵy týrnırde Mońǵolııa, Sırııa men Úndistan boksshylary jaqsy qyrynan kórinýde. Osy kez­ge deıin jartylaı fınalǵa shyq­paǵan atalǵan elderdiń qura­ma­lary­nyń bıylǵy jarysta eki-úsh bylǵary qolǵap sheberleri aq­tyq synǵa joldama alý úshin kúresýde. Taǵy bir atap ótetin nárse, osy jylǵy týrnırge AIVA-nyń tóre­shi­ler alqasynyń jetekshisi Terrı Smıt kelip, Azııa aıma­ǵyndaǵy bir juldyzdy tóreshilerden emtıhan alýda. Olardyń arasynda bizdiń eli­mizden tóreshi er azamattardan basqa eki názik jandy qazy da bar. Týrnır olardyń jumysy T.Smıt­tiń kóńili­nen shyǵyp jatsa, óz isterin adal atqarǵandary úshin olar omy­raý­laryna ekinshi jul­dyzdy qadaı­dy. Dastan KENJALIN.