Fotolar: primeminister.kz
Kezdesý barysynda EAEO elderiniń ekonomıkalyq áleýetin nyǵaıtý, halyqtyń ómir súrý deńgeıin jaqsartý, ózara saýdany damytý, Odaq naryǵyndaǵy kedergilerdi joıýǵa jáne basqa da máselelerge nazar aýdaryldy.
EÚAK keńeıtilgen quramdaǵy otyrysyna Belarýs Respýblıkasynyń Premer-mınıstri Aleksandr Týrchın, Qyrǵyzstan Mınıstrler kabınetiniń tóraǵasy – Qyrǵyz Respýblıkasy Prezıdenti Ákimshiliginiń basshysy Adylbek Qasymalıev, Reseı Federasııasy Úkimetiniń tóraǵasy Mıhaıl Mıshýstın, Armenııa Respýblıkasynyń vıse-premeri Mger Grıgorıan, baqylaýshy elderden – Iran Respýblıkasynyń birinshi vıse-prezıdenti Muhammed-Reza Aref, О́zbekstan Respýblıkasynyń Premer-mınıstri Abdýlla Arıpov, Kýba Respýblıkasynyń Premer-mınıstri Manýel Marrero Krýz (beınekonferensııa arqyly), sondaı-aq Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev qatysty.
Saýda-ekonomıkalyq, kólik-logıstıkalyq, munaı-gaz jáne sıfrlyq salalar, sondaı-aq kedendik jáne bırja qyzmeti, medısına men farmasevtıka, eńbek naryǵy jáne basqa da salalardaǵy ózara is-qımyl qaraldy.
Qazaqstan Premer-mınıstri óz sózinde yntymaqtastyqty damytýdyń basym baǵyttaryn atap ótti. О́zara saýdany damytýǵa jáne syrtqy ekonomıkalyq baılanystardy arttyrý jónindegi birlesken sharalarǵa nazar aýdaryldy.
Jetkizýshilerdiń memlekettik satyp alýlarǵa teń qoljetimdiligin qamtamasyz etý máselelerine basa nazar aýdaryldy.
Kólik jáne logıstıka salasynda óńirdiń barlyq memlekettiń múddelerin eskere otyryp, balamaly baǵyttar qurýdyń ózektiligi aıqyndaldy. Búgingi tańda keleshegi zor kólik baǵyttarynyń biri – ótkizý qabileti 10 mln tonnaǵa deıin júkti quraıtyn «Týrgýndı-Gerat» temirjoly jobasy.
Saýda aǵyndarynyń turaqty ósýin jáne ártaraptandyrylýyn qamtamasyz etý úshin EAEO-nyń úshinshi elder men uıymdar arasyndaǵy yntymaqtastyǵyn keńeıtý mańyzdy. Qazaqstan ár túrli formattaǵy seriktestermen ózara is-qımyldy tereńdetýdi jaqtaıdy.
Jıyn barysynda qatysýshylar gaz, munaı, munaı ónimderiniń ortaq naryqtaryn, sondaı-aq taýarlardyń bırja naryǵyn qalyptastyrýǵa qatysty baıandamalardy tyńdady. Bırjalyq saýda-sattyqty damytý baǵdarlamasy bekitilip, dárilik zattar men medısınalyq buıymdardyń ortaq naryǵyn damytý tujyrymdamasy maquldandy. Bul qujattardy iske asyrý EAEO sheńberinde áriptes elderdiń sapaly ári qaýipsiz ónimin qamtamasyz etýge baǵyttalǵan.
Qatysýshylar klımattyq kún tártibin iske asyrý, kólik dálizderin sıfrlandyrý, eńbek naryǵyndaǵy biliktilik talaptarynyń jaqyndasýy jáne basqa da máselelerge qatysty pikir almasty. Kezdesý qorytyndysy boıynsha 10 qujatqa qol qoıyldy.
EÚAK-tyń kelesi otyrysy bıylǵy 29-30 qyrkúıekte Mınsk qalasynda (Belarýs) ótedi.
